Read Fulfulde Gurtaaki 27 Bible Online

Gurtaaki 27 - Fulfulde bible

Gurtaaki 27

¹“A waɗa hirsirde nde leggal gawaral, njuutirka maare meetir ɗiɗi bee reeta, njaajirka maare boo meetir ɗiɗi bee reeta. Hirsirde laato marnde tolɗi[21] nayi potanɗi. Towirka maare meetir gootel bee reeta.

²A waɗa irin luwe haa coɓɓuli maare nayi, ɗe laato kuuwaaɗum gootum bee hirsirde. A sudda nde bee njamndi mboɗeeri.

³A waɗana nde payanɗe ɓoftugo ndoondi maare, non boo ɓoftirɗe e pehe biccirɗe ƴiiƴam e tufirɗe e pehe gulduɗe. A waɗa kuuje maare fuu bee njamndi mboɗeeri.

⁴A waɗana nde kuuwaaɗum jamɗe boɗeeje gaafiiɗe, nannduɗum bee zubaawol. Haa coɓɓuli man nayi, a waɗa kalagaaje nayi ɗe njamndi mboɗeeri.

⁵A jo'ina kuuwaaɗum go les taarnaaɗum hirsirde, diga les haa ɗum yotto reeta towirka hirsirde.

⁶A waɗa cabbi ngam hirsirde, ɗi leggal gawaral, a sudda ɗi bee njamndi mboɗeeri.

⁷A nastina cabbi man nder kalagaaje haa buttuli hirsirde ɗiɗi ngam roondaago nde.

⁸Nder maare baɗaaɗum bee kaataakooje, laato cookum. Sey a waɗa nde bana mi holli ma dow hooseere.”

⁹“A waɗana boo jooɗorde senaande daldal. Haa wuttudu fombina, a waɗana ngal wiirndallooji gaaraaji leŋ ɗigguɗi baalaaɗi. Njuutirka wuttudu wooru meetir cappanɗe jowi,

¹⁰bee daŋraŋge maaru noogas e kosɗe maaje noogas ɗe njamndi mboɗeeri e ɓilduɗe daŋraŋge e gaafe daŋraŋge ɗe cardi.

¹¹Bana non boo haa wuttudu woyla, njuutirka wiirndallooji meetir cappanɗe jowi, bee daŋraŋge maaru noogas e kosɗe maaje noogas ɗe njamndi mboɗeeri e ɓilduɗe daŋraŋge e gaafe daŋraŋge ɗe cardi.

¹²Njaajirka daldal man haa wuttudu hiirnaaŋge, wiirndallooji meetir noogas e jowi, bee daŋraŋge maaru sappo e kosɗe maaje sappo.

¹³Non boo njaajirka maagal haa wuttudu fuunaaŋge, meetir noogas e jowi:

¹⁴Wiirndallooji meetir joweeɗiɗi bee reeta haa wakeere woore, bee daŋraŋge maare tati e kosɗe maaje tati.

¹⁵Wakeere ndeya boo wiirndallooji meetir joweeɗiɗi bee reeta, bee daŋraŋge maare tati e kosɗe maaje tati.

¹⁶Ngam nastirde daldal, wiirndallo meetir sappo, ngo gaaraaji leŋ ɗigguɗi baalaaɗi e carwinaaɗi e boɗeeji seɗɗa e boɗeeji coy, ɗum laato tuppitaaɗum, bee daŋraŋge maagal nayi e kosɗe maagal nayi.

¹⁷Daŋraŋge daldal fuu kawrite bee gaafe cardi. Ɓilduɗe maaje ɗe cardi, kosɗe maaje ɗe njamndi mboɗeeri.

¹⁸Njuutirka daldal laato meetir cappanɗe jowi, njaajirka maagal meetir noogas e jowi, towirka maagal boo meetir ɗiɗi bee reeta. Wiirndallooji fuu ɗi gaaraaji leŋ ɗigguɗi baalaaɗi, kosɗe fuu ɗe njamndi mboɗeeri.

¹⁹Ngam kuuje jooɗorde senaande e kuugal maaje fuu e tiggirɗe maaje fuu e tiggirɗe daldal fuu ɗe njamndi mboɗeeri.”

²⁰“An Muusa, umru Isra'iila'en ɓe ngaddane nebbam jaytunje arɓaaɗe laaɓɗam ngam jayŋgol pittirlaaji, ngam ɗi njamne foroy.

²¹Haruna e ɓikkoy muuɗum njo'ina jo'inirɗum pittirlaaji nder laymaaru fottirde, gaa'e wiirndallo wiirnanŋgo sundukru seedamku, pittirlaaji kuɓɓa yeeso am diga kiikiiɗe haa fajiri. Ɗo woni farilla nduumiika ngam gide mon fuu.”