Read Fulfulde Gurtaaki 30 Bible Online

Gurtaaki 30 - Fulfulde bible

Gurtaaki 30

¹“A waɗa gulduɗum uurle, bee leggal gawaral mbaarata ɗum.

²Njuutirka man reeta meetir e njaajirka maajum boo reeta meetir, waato marɗum tolɗi[24] nayi potanɗi, towirka man boo meetir gootel. Ɗum laato kuuwaaɗum gootum bee luwe man.

³Suddu ɗum bee kaŋŋeeri laaɓndi, dow maajum e buttuli maajum fuu e luwe maajum. Taarnu sera maajum bee fawne kaŋŋeeri.

⁴Waɗan ɗum kalagaaje kaŋŋeeri ɗiɗi ɗiɗi les fawne sera maajum. Waɗ ɗe haa buttuli maajum ɗiɗi, ɗe njogo cabbi ngam roondaago ɗum.

⁵Waɗ cabbi go bee leggal gawaral, suddu ɗi bee kaŋŋeeri.

⁶Jo'in gulduɗum yeeso wiirndallo wonŋgo yeeso sundukru seedamku bee jooɗorde ngam kefergal, nokkuure haa pottanmi bee maaɗa.

⁷Haruna wula dow maajum uureteeɗum fajiri fuu, saa'i nde o mo'inta pittirlaaji, o wula ɗum.

⁸Non boo nde Haruna jamnata pittirlaaji maŋngariba fuu, o wula ɗum. O waɗa ɗum yeeso Jawmiraawo foroy, haa gide mooɗon fuu.

⁹Taa ngadde dow maajum uurle kaɗaaɗe malla guleteeɗi malla dokke nyaamdu. Taa ndufe dokke dufeteeɗe dow maajum boo.

¹⁰Hitaande fuu nde woore Haruna laɓɓina luwe gulduɗum bee ƴiiƴam kirseteeŋga ngam ittugo hakke. Hitaande fuu nde woore o waɗa ɗum, haa gide mooɗon fuu. Gulduɗum maajum woni ɓurɗum senaago ngam Jawmiraawo.”

¹¹Jawmiraawo wi'i Muusa:

¹²“To a ɗon lima Isra'iila'en fodde limeteeɓe maɓɓe, koo moy maɓɓe fuu hokka Jawmiraawo coottaari yoŋki muuɗum, ngam taa masiibo waɗa wakkati limki.

¹³Ndaa ko ɓe ndokkata: Koo moy nasti limaaɓe fuu reeta ceede cardi bee etirgal suudu seniindu, ɗum laato dokkal ngam Jawmiraawo.

¹⁴Koo moy nasti limaaɓe fuu mo duuɓi noogas haa ko ɓesdi, o hokka Jawmiraawo dokkal man.

¹⁵Diskuɗo ɓurnataa ɗum, talakaajo boo ŋakkintaa ɗum, saa'i ndokkoton Jawmiraawo dokkal ngam coottaari yoŋkiiji mooɗon.

¹⁶Hoo'u ceede coottaari man haa Isra'iila'en, huuwtinir ɗe ngam kuugal nder laymaaru fottirde. Ɗe ciftinoran Isra'iila'en yeeso Jawmiraawo ngam coottaari yoŋkiiji mooɗon.”

¹⁷Fahin Jawmiraawo wi'i Muusa:

¹⁸“Waɗ daaro ngo njamndi mboɗeeri e jo'inirɗum maago ɗum njamndi mboɗeeri ngam laɓɓineeki. Jo'in ngo hakkunde laymaaru fottirde e hirsirde, loow ndiyam nder maago.

¹⁹Haruna e ɓikkoy mum lootira juuɗe e kosɗe muuɗum'en,

²⁰hiddeko ɓe nasta laymaaru fottirde e ɓe ɓadito hirsirde ngam wulugo guleteeɗi ngam Jawmiraawo fuu, ngam taa ɓe maaya.

²¹Sey ɓe loota juuɗe maɓɓe e kosɗe maɓɓe, ngam taa ɓe maaya. Ɗum laatano ɓe farilla nduumiika, kamɓe e danygol maɓɓe haa gide maɓɓe fuu.”

²²Fahin Jawmiraawo wi'i Muusa:

²³“Hoo'u uurle ɓurɗe uurugo: Uurdi baɗaadi kilo jowi e uurdi sinamon mbelndi reeta man, waato kilo ɗiɗi bee reeta e ƴommbal uurŋgal kilo ɗiɗi bee reeta

²⁴e uurdi kassiya kilo jowi fodde etirgal suudu seniindu e nebbam jaytunje liitir nayi.

²⁵Waɗ bee maajum nebbam cenirɗam, jillindiraaɗam uurle bana baɗoowo uurle jillirta ɗum. Ɗum laato nebbam cenirɗam.

²⁶Huuwtinir ɗam ngam senugo laymaaru fottirde e sundukru seedamku

²⁷e taabal bee kuuje maagal fuu e jo'inirɗum pittirlaaji bee kuuje maajum fuu e gulduɗum uurle

²⁸e hirsirde e kuuje maare fuu e daaro bee jo'inirɗum maago.

²⁹A sena ɗum fuu, ɗum laato ɓurɗum senaago. Koo ɗume meemi ɗum fuu, senoto.

³⁰Ruf ɗam dow Haruna e ɓikkoy mum. Sen ɓe haa ɓe kuuwanammi kuugal limanku.

³¹Ɓaawoɗon a wi'a Isra'iila'en: Kanjum ɗum laatano on nebbam cenirɗam haa gide mooɗon fuu.

³²Taa neɗɗo wujoro ɗam. Taa mbaɗe jillindiraaɗum feere irin maajam, ngam ɗam ceniiɗam, on camɗina ɗam ngam ɗam cenaaɗam.

³³Koo moy jilli irin maajam malla hokki ɗam mo laataaki limanjo, o gurtinteeɗo diga jama'aare maako.”

³⁴Fahin Jawmiraawo wi'i Muusa: “Hoo'u uurle uurooje: Ɗacce sitakte e galbanum, non boo onika e uurle daneeje laaɓɗe. Ɗum fuu ɗum fota kal-kal.

³⁵Waɗ bee maajum uurdi uureteendi, jillindiraaɗum bana baɗoowo uurle jillirta ɗum, lamminaaɗum bee mannda, laaɓɗum, ceniiɗum.

³⁶Hoo'u haa maajum seɗɗa, ɗiggin ɗum. Jo'in ɗum yeeso sundukru seedamku nder laymaaru fottirde, haa nokkuure nde pottanmi bee maaɗa. Sey on camɗina ɗum, ngam ɗum ɓurɗum senaago.

³⁷Uurdi uureteendi ndi mbaɗata ɗum, taa mbaɗane ko'e mooɗon irin maari. Ndi laatano on cenaandi ngam Jawmiraawo.

³⁸Koo moy jilli irin maari ngam o luuɓno ndi, o gurtinteeɗo diga jama'aare maako.”