Read Fulfulde Gurtaaki 35 Bible Online

Gurtaaki 35 - Fulfulde bible

Gurtaaki 35

¹Muusa mooɓti yimɓe jama'aare Isra'iila fuu, wi'i ɓe: “Ndaa ko Jawmiraawo umri on waɗugo:

²Nyalɗe joweego goɗɗo huuwata kuugal. Ammaa nyalaade joweeɗiɗawre laatano on nyalaade seniinde, nyannde siwtorde ngam Jawmiraawo. Koo moy huuwi kuugal nder maare, o mbareteeɗo.

³Taa kuɓɓe yiite nder joole mooɗon fuu nyannde siwtorde.”

⁴Muusa wolwani yimɓe jama'aare Isra'iila fuu, o wi'i: “Ndaa ko Jawmiraawo umri:

⁵Koo'e haa mooɗon dokkal ngam Jawmiraawo. Koo moy marɗo ɓernde saahiinde fuu wadda dokkal maajum: Kaŋŋeeri e cardi e njamndi mboɗeeri

⁶e gaaraaji leŋ ɗigguɗi e carwinaaɗi e boɗeeji seɗɗa e boɗeeji coy e gaasa be'i

⁷e lare jawɗi baali boojinaaɗe e lare liɗɗi mawɗi e leggal gawaral,

⁸nebbam ngam jo'inirɗum pittirlaaji e uurle ngam nebbam cenirɗam e uureteeɗum,

⁹non boo kaa'e onikis e kaa'e takkugo haa ɗancikiire e jiiba wiɓɓere ngam limanjo.”

¹⁰“Huuwooɓe waawɓe caka mooɗon fuu ngara ngam ɓe kuuwa ko Jawmiraawo umri fuu:

¹¹Jooɗorde senaande bee laymaaru maare e suddaare maare e jokkinirɗe maare e kaataakooje maare e gaafotooɗe maare e daŋraŋge maare bee kosɗe maaje,

¹²sundukru bee cabbi maaru e jooɗorde ngam kefergal e wiirndallo,

¹³taabal bee cabbi maagal e kuuje maagal fuu e tamseeje jo'inteeɗe,

¹⁴jo'inirɗum pittirlaaji e kuuje maajum e pittirlaaji maajum e nebbam ngam jaynuki pittirla,

¹⁵gulduɗum uurle bee cabbi man e nebbam cenirɗam e uureteeɗum e wiirndallo ngam dammugal jooɗorde senaande,

¹⁶hirsirde ngam guleteeɗi e kuuwaaɗum bee gaafiiɗe ɗe jamɗe boɗeeje haa maare e cabbi maare e kuuje maare fuu e daaro bee jo'inirɗum maago,

¹⁷wiirndallooji daldal e daŋraŋge maagal e kosɗe maagal e wiirndallo haa nastirde daldal,

¹⁸tiggirɗe jooɗorde senaande e tiggirɗe daldal bee ɓoggi maaje,

¹⁹limce dewal ngam kuugal nder suudu seniindu, waato limce ceniiɗe ngam Haruna, limanjo e limce ɓikkoy muuɗum ngam huuwugo kuugal limanku.”

²⁰Jama'aare Isra'iila fuu dilli, acci Muusa.

²¹Koo moy mo ɓernde muuɗum ummini ɗum e koo moy mo ruuhu muuɗum saahini ɗum, wari, waddani Jawmiraawo dokkal ngam waɗugo laymaaru fottirde e kuugal nder maaru fuu, non boo ngam limce ceniiɗe.

²²Worɓe e rewɓe ngari, koo moy marɗo ɓernde saahiinde waddi kalagaaje kine e kalagaaje kooli e yerihon e kuuje kaŋŋeeri feere feere. Koo moy waddi dokkal kaŋŋeeri, lii'i ngal yeeso Jawmiraawo.

²³Koo moy marɗo gaaraaji leŋ ɗigguɗi e carwinaaɗi e boɗeeji seɗɗa e boɗeeji coy e gaasa be'i e lare jawɗi baali boojinaaɗe e lare liɗɗi mawɗi, waddi ɗum.

²⁴Koo moy hoo'i cardi malla njamndi mboɗeeri, waddani Jawmiraawo dokkal man. Koo moy marɗo leggal gawaral ngam kuuɗe feere feere, waddi ngal.

²⁵Rewɓe mottooɓe waawɓe fuu motti bee juuɗe muuɗum'en, ɓe ngaddi mottaaɗum: Gaaraaji leŋ ɗigguɗi e carwinaaɗi e boɗeeji seɗɗa e boɗeeji coy.

²⁶Rewɓe waawɓe fuu ɓe ɓerɗe muuɗum'en ummini, motti gaasa be'i.

²⁷Ardiiɓe ngaddi kaa'e onikis e kaa'e takkugo haa ɗancikiire e jiiba wiɓɓere

²⁸e uurle ngam nebbam pittirla e ngam nebbam cenirɗam e uureteeɗum.

²⁹Isra'iila'en, worɓe e rewɓe marɓe ɓerɗe caahiiɗe fuu ngaddani Jawmiraawo dokkal caahiiŋgal ngam waɗugo ko Jawmiraawo umri ɓe bee hunnduko Muusa fuu.

³⁰Muusa wi'i Isra'iila'en: “Annde, Jawmiraawo suɓi Becaleel ɓii Uuri taaniraawo Huuru mo lenyol Yahuuda.

³¹O hebbini mo Ruuhu maako e hikma e faamu e anndal kuugal koo ngale fuu,

³²haa o suurɗina kuuje, o huuwa kuuɗe kaŋŋeeri e cardi e njamndi mboɗeeri,

³³o winnda dow kaa'e ngam takkugo, o seha leɗɗe, o timmina kuuɗe koo ɗeye fuu bee baawal.

³⁴Kaŋko e Oholiyabu ɓii Ahisamak mo lenyol Dan, Jawmiraawo hokki ɓe anndal ngam ɓe ekkitina woɗɓe.

³⁵O hokki ɓe anndal ɗuuɗŋgal, ngam ɓe kuuwa kuugal koo ngale, waato kuugal cehoowo e tuppitoowo e cannyoowo e nyootoowo limce leŋ ɗigguɗe carwinaaɗe e boɗeeje seɗɗa e boɗeeje coy. Ɓe mbaawan huuwugo e suurɗingo kuuɗe ɗe'e fuu”.