Read Fulfulde Gurtaaki 36 Bible Online

Gurtaaki 36 - Fulfulde bible

Gurtaaki 36

¹“Becaleel e Oholiyabu e worɓe waawɓe fuu ɓe Jawmiraawo waɗi anndal nder ɓerɗe muuɗum'en, puɗɗi waɗugo koo ɗume nder suudu seniindu fuu bana Jawmiraawo umri ɗum.”

²Muusa ewni Becaleel e Oholiyabu e worɓe waawɓe fuu, ɓe Jawmiraawo waɗi anndal nder ɓerɗe muuɗum'en, koo moy mo ɓernde muuɗum ummini ɗum o yaha haa kuugal, o huuwa ngal.

³Ɓe keɓi haa Muusa dokkal ngal Isra'iila'en ngaddi ngam huuwugo kuugal suudu seniindu. Fajiri fuu yimɓe ngaddani Muusa dokke caahiiɗe.

⁴Worɓe waawɓe fuu, huuwooɓe kuuɗe suudu seniindu feere feere, acci kuuɗe muuɗum'en, ngari,

⁵mbi'i Muusa: “Yimɓe ɗon ngadda ɗuuɗɗum, ko ɓuri haaje haa timmingo kuugal ngal Jawmiraawo umri huuwugo.”

⁶Muusa umri ɓe mbaɗa wooynaandu bana nii nder saŋngeere fuu: “Taa gorko malla debbo ɓesda waddugo dokkal ngam kuugal suudu seniindu!” Bana non ɓe kaɗiri yimɓe, taa ɓe tokko waddugo kuuje.

⁷Kuuje ke'i ngam kuugal ngal ɓe kuuwata fuu, haa ɗum lutti boo.

⁸Waawɓe huuwugo caka huuwooɓe mbaɗi jooɗorde senaande bee godooje sappo ɗe gaaraaji leŋ ɗigguɗi baalaaɗi e carwinaaɗi e boɗeeji seɗɗa e boɗeeji coy, bee suuraaji keruba'en ɗi tuppitoowo baawɗo tuppiti.

⁹Njuutirka godoore waɗi meetir sappo e nayi, njaajirka maare boo meetir ɗiɗi, godooje fuu poti kal-kal.

¹⁰Becaleel jokkindiri godooje jowi, o nyooti ɗe. Non boo godooje jowi goɗɗe.

¹¹O waɗi peɗinirɗe ɓoggi carwinaaɗi haa sera godoore ragareere haa jokkindiraaɗum gootum. Non boo haa sera godoore aranndeere haa jokkindiraaɗum feere.

¹²O waɗi peɗinirɗe cappanɗe jowi haa godoore woore, o waɗi boo peɗinirɗe cappanɗe jowi haa sera godoore wonnde haa jokkindiraaɗum ɗiɗaɓum. Peɗinirɗe maajum tiitotiri.

¹³O waɗi jokkinirɗe ɗe kaŋŋeeri cappanɗe jowi. O hawriti jokkindiraaɗe bee maaje, haa jooɗorde senaande fuu laati woore.

¹⁴Nden o waɗi godooje gaasa be'i ngam laymaaru dow jooɗorde senaande, godooje sappo e go'o o waɗi.

¹⁵Njuutirka godoore waɗi meetir sappo e jowi, njaajirka maare boo meetir ɗiɗi, godooje sappo e go'o fuu poti kal-kal.

¹⁶O jokkindiri godooje jowi, o nyooti ɗe, non boo godooje joweego goɗɗe.

¹⁷O waɗi peɗinirɗe cappanɗe jowi haa sera godoore ragareere haa jokkindiraaɗum gootum. O waɗi boo peɗinirɗe cappanɗe jowi haa sera jokkindiraaɗum ɗiɗaɓum.

¹⁸O waɗi jokkinirɗe ɗe njamndi mboɗeeri cappanɗe jowi ngam hawtugo laymaaru, ndu laato wooru.

¹⁹O waɗani laymaaru suddaare bee lare jawɗi baali boɗeeje, dow maare boo suddaare feere bee lare liɗɗi mawɗi.

²⁰O waɗi kaataakooje darotooɗe ngam jooɗorde senaande ɗe leɗɗe gabde.

²¹Njuutirka kaataakowal waɗi meetir jowi, njaajirka maagal boo meetir gootel reetita walaa.

²²Jogorɗe ɗiɗi potanɗe haa kaataakowal fuu ngam jogotirgo, bana non o waɗi haa kaataakooje jooɗorde senaande fuu.

²³O waɗi kaataakooje ngam jooɗorde senaande: Noogas haa wuttudu fombina

²⁴e kosɗe cappanɗe nayi ɗe cardi les kaataakooje man, kosɗe ɗiɗi les kaataakowal gootal haa jogorɗe maagal.

²⁵O waɗi boo kaataakooje noogas haa wuttudu jooɗorde senaande woɗndu, waato wuttudu woyla,

²⁶bee kosɗe maaje cappanɗe nayi ɗe cardi, kosɗe ɗiɗi les kaataakowal gootal.

²⁷O waɗi kaataakooje joweego ngam wuttudu ɓaawo jooɗorde senaande, wuttudu hiirnaaŋge.

²⁸O waɗi kaataakooje ɗiɗi ngam coɓɓuli jooɗorde senaande, wuttudu ɓaawo.

²⁹Jogorɗe ɗiɗi haa les, non boo jogorɗe ɗiɗi haa dow baŋnge halagaare. Bana non o waɗi kaataakooje coɓɓuli ɗiɗi fuu.

³⁰Woodi kaataakooje joweetati bee kosɗe maaje ɗe cardi, kosɗe sappo e joweego, kosɗe ɗiɗi les kaataakowal fuu.

³¹O waɗi leɗɗe gaafotooɗe bee leɗɗe gaware, jowi ngam kaataakooje wuttudu jooɗorde senaande wooru

³²e gaafotooɗe jowi ngam kaataakooje wuttudu jooɗorde senaande nduya, fahin gaafotooɗe jowi ngam kaataakooje wuttudu ɓaawo jooɗorde senaande, waato wuttudu hiirnaaŋge.

³³O waɗi gaafotooŋgal cakaawal dow kaataakooje, ngal gootal diga soɓɓundu ndu'u haa soɓɓundu nduya.

³⁴O suddi kaataakooje bee kaŋŋeeri. O waɗi kalagaaje kaŋŋeeri ngam jogaago gaafotooɗe, o suddi gaafotooɗe boo bee kaŋŋeeri.

³⁵O waɗi wiirndallo bee gaaraaji leŋ ɗigguɗi baalaaɗi e carwinaaɗi e boɗeeji seɗɗa e boɗeeji coy. Tuppitoowo baawɗo tuppiti ngo bee suuraaji keruba'en.

³⁶O waɗani ngo daŋraŋge nayi ɗe leɗɗe gabde. O suddi ɗe bee kaŋŋeeri. Ɓilduɗe maaje boo ɗe kaŋŋeeri. O ɓolwini ngam maaje kosɗe nayi ɗe cardi.

³⁷O waɗi wiirndallo ngam dammugal laymaaru bee gaaraaji leŋ ɗigguɗi baalaaɗi e carwinaaɗi e boɗeeji seɗɗa e boɗeeji coy, ɗum tuppitaaɗum.

³⁸O waɗi daŋraŋge maago jowi e ɓilduɗe maaje e gaafe maaje bee kaŋŋeeri. Kosɗe maaje jowi ɗe njamndi mboɗeeri.