Read Fulfulde Gurtaaki 40 Bible Online

Gurtaaki 40 - Fulfulde bible

Gurtaaki 40

¹Jawmiraawo wi'i Muusa:

²“Nyannde go'oore nder lewru aranndu, sey a darna jooɗorde laymaaru fottirde.

³Jo'in sundukru seedamku nder maare, a wiirna ndu bee wiirndallo.

⁴Nastin taabal, taaskitin ko woni dow maagal. Nastin boo jo'inirɗum pittirlaaji, jamnu pittirlaaji maajum.

⁵Jo'in gulduɗum uurle ɗum kaŋŋeeri yeeso sundukru seedamku. Ɓil wiirndallo haa dammugal jooɗorde senaande.

⁶Jo'in hirsirde ngam wulugo guleteeɗi yeeso dammugal jooɗorde, waato laymaaru fottirde.

⁷Jo'in daaro hakkunde laymaaru fottirde e hirsirde. Loow ndiyam nder maago.

⁸Darnu wiirndallooji taarotooɗi daldal fuu, ɓil wiirndallo haa dammugal maagal.

⁹Hoo'u nebbam cenirɗam. Wuju jooɗorde senaande e ko woni nder maare fuu bee maajam. Senu nde e kuuje maare fuu, nde laato seniinde.

¹⁰Wuju hirsirde e kuuje maare bee nebbam go. Senu hirsirde, nde laato ɓurnde senaago.

¹¹Wuju daaro e jo'inirɗum maago bee nebbam, sen ngo.

¹²Ɓaditin Haruna e ɓikkoy mum haa dammugal laymaaru fottirde, ɓe laɓɓina ko'e maɓɓe bee ndiyam.

¹³Ɓornu Haruna limce ceniiɗe, ruf nebbam go dow maako, sen mo, ngam o huuwanammi kuugal limanku.

¹⁴Ɓaditin boo ɓikkoy maako, ɓornu ɓe toggooje.

¹⁵Ruf ɗam dow maɓɓe bana ndufirɗa ɗam dow baaba maɓɓe, ngam ɓe kuuwanammi kuugal limanku. Dufki nebbam ɗa'am dow maɓɓe nastina ɓe nder kuugal limanku nduumiiŋgu nder gide maɓɓe fuu.”

¹⁶Muusa waɗi koo ɗume fuu bana Jawmiraawo umri mo.

¹⁷Lewru aranndu nder nduuɓu ɗiɗaɓru, nyannde go'oore maaru, jooɗorde senaande darnaama.

¹⁸Muusa darni nde. O jo'ini kosɗe maare, o darni kaataakooje maare, o waɗi gaafotooɗe maare, o darni daŋraŋge maare.

¹⁹Nden o we'iti laymaaru dow maare. O we'iti suddaare haa dow maaru, bana Jawmiraawo umruno mo.

²⁰O hoo'i alluhaaje seedamku, o waati ɗe nder sundukru. O waɗi cabbi haa maaru, o wallini jooɗorde ngam kefergal dow maaru.

²¹O nastini ndu nder jooɗorde senaande, o ɓili wiirndallo, o wiirni sundukru seedamku bee maago, bana Jawmiraawo umruno mo.

²²O jo'ini taabal nder laymaaru fottirde haa wuttudu jooɗorde woyla, yaasi wiirndallo.

²³O yowndindiri tamseeje jo'inteeɗe dow maagal yeeso Jawmiraawo, bana o umruno mo.

²⁴O jo'ini jo'inirɗum pittirlaaji nder jooɗorde laymaaru fottirde haa ɗum tiitotira bee taabal, wuttudu jooɗorde nde fombinaare.

²⁵O jamni pittirlaaji yeeso Jawmiraawo, bana Jawmiraawo umruno mo.

²⁶O jo'ini gulduɗum uurle ɗum kaŋŋeeri nder laymaaru fottirde, yeeso wiirndallo.

²⁷O wuli dow maajum uureteeɗum, bana Jawmiraawo umruno mo.

²⁸O ɓili wiirndallo haa dammugal jooɗorde senaande.

²⁹O darni hirsirde haa dammugal jooɗorde laymaaru fottirde. O lii'i dow maare nguleteeŋga e dokkal nyaamdu, bana Jawmiraawo umruno mo.

³⁰O jo'ini daaro hakkunde laymaaru fottirde e hirsirde, o loowi ndiyam nder maago ngam laɓɓineeki.

³¹Muusa e Haruna e ɓikkoy mum lootira juuɗe e kosɗe muuɗum'en,

³²nde ɓe nastata laymaaru fottirde fuu. Bana nii ɓe laɓɓinirta ko'e maɓɓe hiddeko ɓe ɓadito hirsirde, bana Jawmiraawo umruno Muusa.

³³O waɗi daldal taarotooŋgal jooɗorde senaande e hirsirde fuu, o ɓili wiirndallo haa nastirde maagal. Bana non Muusa timminiri kuugal fuu.

³⁴Ruuldere suddi jooɗorde laymaaru fottirde. Tedduŋgal Jawmiraawo hebbini jooɗorde.

³⁵Muusa waawaay nastugo jooɗorde laymaaru fottirde, ngam ruulde waali dow maaru, tedduŋgal Jawmiraawo hebbini jooɗorde.

³⁶Nde ruulde eeŋgi diga jooɗorde senaande fuu, Isra'iila'en ummo, mbaɗa jahaale muuɗum'en.

³⁷To ruulde eeŋgaay, ɓe ummataako, haa nyalaade nde eeŋga.

³⁸Ngam nder nyalawma, ruulde Jawmiraawo ɗon dow jooɗorde senaande. Jemma boo yiite ɗon nder maare yeeso Isra'iila'en nder jahaale maɓɓe fuu.