Read Fulfulde Gurtaaki 6 Bible Online

Gurtaaki 6 - Fulfulde bible

Gurtaaki 6

¹Jawmiraawo jaabi Muusa: “Jonta a yi'an ko mi waɗata Firawna! Mi doolan mo bee juŋngo am semmbiɗŋgo, o yooftan Isra'iila'en, fakat mi doolan mo riiwugo ɓe diga lesdi maako.”

²Fahin Jawmiraawo wolwani Muusa, wi'i mo: “Min woni Jawmiraawo.

³Mi waŋgani Ibrahiima e Isiyaaku e Yaakubu, mi Allah Baawɗo. Ammaa mi anndinaay hoore am haa maɓɓe bee innde am Jawmiraawo.

⁴Mi haɓɓi alkawal bee maɓɓe, mi iinani ɓe mi hokkan ɓe lesdi Kanaana, lesdi ndi ɓe koɗi nder muuɗum.

⁵Jonta mi nani uumaali Isra'iila'en, ɓe Misra'en ndooli huuwugo kuugal naawŋgal. Mi siftori alkawal am bee maɓɓe.

⁶Ngam maajum yeccu Isra'iila'en ni'i: Min woni Jawmiraawo, Mi hisnan on diga ɓillaare kuugal Misra'en caatuŋgal, mi wurtinan on maccuŋgaaku maɓɓe, mi rimɗinan on bee juŋngo am fortaaŋgo e kiitaaji am mawɗi.

⁷Mi laatinan on ummaatoore am, mi laatoto Allah mooɗon. On anndan min woni Jawmiraawo Allah mon, mo wurtini on diga kuugal Misra'en caatuŋgal.

⁸Mi yahran on nder lesdi ndi kuniimi hokkugo Ibrahiima e Isiyaaku e Yaakubu. Mi hokkan on ndi, ndi laatoto maral mooɗon. Min woni Jawmiraawo.”

⁹Muusa yecci ɗum Isra'iila'en, ammaa ɓe cali nanango mo ngam ɓerɗe maɓɓe nusi daliila kuugal caatuŋgal.

¹⁰Nden Jawmiraawo wi'i Muusa:

¹¹“Yah haa Firawna, laamiiɗo Misra, wi' mo o yoofta Isra'iila'en ngurto lesdi maako.”

¹²Muusa wi'i Jawmiraawo: “Laar! Koo Isra'iila'en boo cali nanango yam. Noy Firawna waawrata nanango yam, min tedda-ɗemŋgaljo?”

¹³Nden Jawmiraawo wolwani Muusa e Haruna. O hokki ɓe umroore yahugo haa Isra'iila'en e haa Firawna, ngam wurtingo Isra'iila'en diga lesdi Misra.

¹⁴Ndaa limgal baaba-ci'e'en[5] Isra'iila. Ɓiɓɓe Ruben, afo Isra'iila: Hanok e Pallu e Hesruunu e Karmi. Kamɓe ngoni baaba-ci'e'en nder lenyol Ruben.

¹⁵Ɓiɓɓe Simeyon, ɓe'e: Yemuwel e Yamin e Ohad e Yakin e Cohar e Sawulu, ɓii Kanaaniijo debbo. Kamɓe ngoni baaba-ci'e'en nder lenyol Simon.

¹⁶Ndaa inɗe ɓiɓɓe Lewi fodde gide maɓɓe: Gerson e Kahat e Meraari. Lewi yeeɗi duuɓi teemerre e cappanɗe tati e joweeɗiɗi (137).

¹⁷Ɓiɓɓe Gerson ngoni: Libni e Sim'i, fodde ci'e maɓɓe.

¹⁸Ɓiɓɓe Kahat ngoni: Amram e Yicehar e Heburuun e Uzziyel. Kahat yeeɗi duuɓi teemerre e cappanɗe tati e tati (133).

¹⁹Ɓiɓɓe Meraari ngoni: Mahali e Musi. Kamɓe ngoni baaba ci'e Lewi'en fodde danygol maɓɓe.

²⁰Amram ɓaŋgi goggo mum Yokebet. O danyani mo Haruna e Muusa. Amram yeeɗi duuɓi teemerre e cappanɗe tati e joweeɗiɗi (137).

²¹Ɓiɓɓe Yicehar ngoni: Koora e Nefek e Zikiri.

²²Ɓiɓɓe Uzziyel ngoni: Miisayel e Elicafan e Sitiri.

²³Haruna ɓaŋgi Eliseba ɓii Amminadabu, deerɗiraawo Nahasunu debbo. O danyani mo Nadab e Abihu e Eli'azaaru e Itamar.

²⁴Ɓiɓɓe Koora ngoni: Assir e Elkaana e Abiyasaf. Kamɓe ngoni baaba-ci'e'en Koora'en.

²⁵Eli'azaaru ɓii Haruna ɓaŋgi gooto haa ɓiɓɓe Putiyel rewɓe. O danyani mo Pinehas. Kamɓe ngoni baaba-ci'e'en Lewi'en fodde ci'e maɓɓe.

²⁶Ɗum Haruna e Muusa ɓen Jawmiraawo umri, wi'i ɓe: “Ngurtine honooɓe am, waato ummaatoore am Isra'iila diga lesdi Misra, fodde mooɓe maɓɓe nder wakkatiire woore.”

²⁷Kamɓe mbolwani Firawna, laamiiɗo Misra, ngam wurtingo Isra'iila'en diga lesdi maako. Ɗum Muusa e Haruna.

²⁸Nyalaade nde Jawmiraawo wolwani Muusa nder lesdi Misra go,

²⁹o wi'i mo: “Min woni Jawmiraawo. Yah yeccu Firawna, laamiiɗo Misra, ko mi wolwani ma fuu.”

³⁰Ammaa Muusa jaabi Jawmiraawo: “Mi tedda-ɗemŋgaljo. Noy Firawna waawrata nanango yam?”