Read Fulfulde Ayuba 1 Bible Online

Ayuba 1 - Fulfulde bible

Ayuba 1

¹Woodino goɗɗo haa lesdi Uus, innde maako Ayuba. Goɗɗo oo o timmuɗo, gooŋgaajo, o kulɗo Allah, o daayiiɗo halleende.

²O danyanaama ɓiɓɓe worɓe njoweeɗiɗo e ɓiɓɓe rewɓe tato.

³O mari dammooji ujine joweeɗiɗi e geelooɗi ujine tati e ga'i cindaaɗi ɗiɗi ɗiɗi nde teemeɗɗe jowi e bamɗe debbe teemeɗɗe jowi e jeyaaɓe ɗuuɗɓe masin nder saare. Goɗɗo oo ɓuri yimɓe fuunaaŋge fuu maŋngu.

⁴Ɓiɓɓe maako worɓe ɗonno mbeernindira haa ci'e[1] muuɗum'en ngam nyaamugo, koo moy nde nyalaade mum yaalti. Ɓe ɗonno ewna deerɗiraaɓe maɓɓe rewɓe tato, haa ɓe nyaamda, ɓe njarda bee maɓɓe.

⁵To nyalɗe man timmi, Ayuba ɗonno ewna ɓiɓɓe muuɗum ngam senugo ɓe. O ɗonno dawa cub, o lii'ana Allah guleteeɗi ngam kawtal koo moy maɓɓe bee Allah. Ngam o ɗonno numa: “Teema ɓiɓɓe am mbaɗi hakke, kuɗi Allah nder ɓerɗe muuɗum'en.” Bana nii Ayuba ɗonno waɗa foroy.

⁶Nyannde feere ɓiɓɓe Allah[2] ngari haa ndaro yeeso Jawmiraawo. Sayɗaanu boo wari caka maɓɓe.

⁷Jawmiraawo ƴami mo: “Diga toy ngarɗa?” Sayɗaanu jaabi: “Mi yiiloyi koo toy haa duniyaaru.”

⁸Jawmiraawo ƴami mo: “A hakkilani jaggiiɗo am Ayuba na? Irin maako walaa haa duniyaaru, o goɗɗo timmuɗo, gooŋgaajo, kulɗo yam, daayiiɗo halleende.”

⁹Sayɗaanu jaabi: “Kadi Ayuba ɗon hule meere na?

¹⁰Naa a howi mo kowaagol, kaŋko e saare maako e ko o mari fuu? A barkiɗini kuugal juuɗe maako, tokke maako ɗuuɗi haa lesdi.

¹¹Ammaa to a forti juŋngo ma, a meemi ko o mari fuu, o huɗete bee baŋguɗum!”

¹²Jawmiraawo wi'i Sayɗaanu: “Ndaa, ko o mari fuu ɗon haa juŋngo ma. Ammaa taa meemu ɓanndu maako kam.” Nden Sayɗaanu dilli.

¹³Nyannde feere ɓiɓɓe Ayuba worɓe e rewɓe ɗonno nyaamda e njarda nder saare mawniraawo muuɗum'en.

¹⁴Goɗɗo waddani Ayuba habaru, wi'i mo: “Min ɗonno ndema bee ga'i. Bamɗe ɗonno ndura kommbi maaji,

¹⁵Saba'en ukkani min, njaɓti dabbaaji fuu. Ɓe mbari huuwanooɓe ma bee kaafahi. Min feere am daɗi, mi wari anndingo ma ɗum.”

¹⁶Diga o timminaay wolwugo, goɗɗo feere wari, wi'i: “Yiite Allah do'i diga asama, wuli tokke baali maaɗa e huuwanooɓe ma fuu. Min feere am daɗi, mi wari anndingo ma ɗum.”

¹⁷Diga o timminaay wolwugo, goɗɗo feere wari, wi'i: “Kaldiya'en mbaɗi mooɓe tati, ukkani geelooɗi, kooci ɗi. Ɓe mbari huuwanooɓe ma bee kaafahi. Min feere am ɗaɗi, mi wari anndingo ma ɗum.”

¹⁸Diga o ɗon wolwa tawon, goɗɗo feere wari, wi'i: “Ɓiɓɓe ma worɓe e rewɓe ɗonno nyaamda e njarda nder saare mawniraawo maɓɓe,

¹⁹henndu saatundu iwndu ladde hamaadaare wari, faɗɗi coɓɓuli suudu nayi fuu. Ndu yibbi dow derke'en, ɓe maayi. Min feere am daɗi, mi wari anndingo ma ɗum.”

²⁰Nden Ayuba ummi, seeki alkibbaare mum, laɓi hoore mum, do'i haa lesdi, sujidi.

²¹O wi'i: “Temmbo ngurtiimi reedu daada[3] am, temmbo boo lorotoomi. Jawmiraawo hokki, Jawmiraawo hoociti, barka laatano innde Jawmiraawo!”

²²Nder torraaji ɗi'i fuu, Ayuba waɗaay hakke, o wolwaay kalluka dow Allah.