Read Fulfulde Ayuba 10 Bible Online

Ayuba 10 - Fulfulde bible

Ayuba 10

¹Ndaa, ɓernde am ɗoylake yeeɗugo. Ngam maajum mi yoofan uumaali am, mi wolwan bee kaaɗɗum haa ɓernde am.

²Nii mbi'anmi Allah: Taa hiitam! Anndinam koni aybinta yam.

³Ɗum fottani ma na, to a ɓilli yam, a yoofti ko juuɗe ma mbaɗi fuu bee hiɓɓingo anniyaaji halluɓe na?

⁴A woodi gite bana ɗe neɗɗo na? A ɗon laara bana neɗɗo maayanɗo laardata na?

⁵Balɗe ma boo ndamman bana ɗe maayooɓe na e duuɓi ma boo ndamman bana ɗi neɗɗo na?

⁶Ngam ndaa, a ɗon ɗaɓɓita aybe am, a ɗon wiɗito hakke am.

⁷A anndi mi laaɓɗo, walaa kisnanɗo yam diga juŋngo ma.

⁸Juuɗe ma mbaɗi yam, tagi yam. A wayliti jonta, a yiɗi halkugo yam!

⁹Siftor, bee loope a tagri yam, a yiɗi boo lornugo yam haa nder mbulwuldi na?

¹⁰An rufi yam bana kosam. An nyallini yam bana torjam.

¹¹Bee laral e kusel a ɓorni yam, bee i'e e ɗaɗi a sannyi yam.

¹²A hokki yam yoŋki e mo'ere, a ayni yam jam bee mbooɗeeŋga ma.

¹³Ammaa woodi sirri a suuɗi haa ɓernde ma. Mi anndi ɗum ko woni nder numo ma:

¹⁴To mi waɗi hakkeeji, a laarndo yam, a salo yaafaago aybeeji am.

¹⁵Fakat, to mi aybuɗo, bone laatanto yam! Koo to mi laaɓɗo, mi ɓaŋgtataa hoore am, mi heewi bee torra e mettamɓeram tan.

¹⁶To mi ɓaŋgti hoore am, an a taasnatam, a taasnatam bana mbarooga non, foroy a ɗon hollammi baawɗe ma.

¹⁷Foroy a ɗon darna wullooɓe yam, tikke maaɗa boo ɗon ɗuuɗana yam, mooɓe konne'en ɗon ukkano yam.

¹⁸Koni ngurtinɗa mi diga reedu daada am? Mi maayanno hiddeko goɗɗo yi'ammi!

¹⁹Mi laatanno bana mo waŋgaay sam, ɓe uwanno yam ɓaawo wurtaago reedu daada am.

²⁰Naa balɗe am pamare lutti na? Accam haa mi welwita seɗɗa.

²¹Neeɓataa mi dillan, mi lorataako boo haa lesdi ndi nyiɓɓi bee nyiɓre sukkunde.

²²Ton nyiɓre e bonnuki meere laamoto, koo jayŋgol boo nanndi jemmaare nyiɓɓunde.