Read Fulfulde Ayuba 11 Bible Online

Ayuba 11 - Fulfulde bible

Ayuba 11

¹Nden Cofar Na'amiijo wi'i:

²Ɗuuɗal bolle ma heɓaay jaawaabu na? Waawugo wolde yiɗaa wi'go a gooŋɗuɗo!

³An a tammi harakaaji ma nje'inan yimɓe na? Walaa cemtinɗo ma ngam a janci ɓe na?

⁴An a wi'i: “Mi laaɓɗo nder bolle am, walaa aybewol mbaɗmi dow Allah sam.”

⁵Asee, to Allah bee hoore mum yiɗno wolwango ma, to o maɓɓitino hunnduko ngam wolwango ma,

⁶o waŋginanteno sirriiji hikma maako fuu, ɗi yimɓe mbaawataa faamugo, nden a faamanno Allah limanaay ma hakkeeji maaɗa fuu.

⁷An a waawan heɓtugo lugguɗum Allah na? An a waawan faamdugo timmuki Baawɗo na?

⁸Hikma maako ɓuri koo asama towugo, ko mbaawata waɗugo? Ka ɓuri jahannama luggugo. A waawan faamugo ka na?

⁹Ka ɓuri duniyaaru fuu juutugo, ka ɓuri koo mbeela boo yaajugo.

¹⁰To Allah naŋngi aybuɗo, yahri mo yeeso kiita, moy he'i dartanaago mo?

¹¹Ngam Allah anndi yimɓe meere'en, koo to o hakkilantaa halleende, o yi'an haa nde woni.

¹²Paataaɗo laatataako hikmaajo sam, sonaa to wamnde ladde laatake wamnde eltaande.

¹³Ammaa an, sey a dartina ɓernde ma, a weeɗa juuɗe ma heedi Allah.

¹⁴To juuɗe ma tunwino bee halleende, a laɓɓina ɗe, taa sooynde adilaaku boo wona nder ma,

¹⁵nden kam, a ɓaŋgtan gite ma, a laaɓɗo, a daroto bilaa kulol.

¹⁶Nden a yejjitan torra e kalluɗum, bana ilam caaliiɗam, a numtataa ɗum.

¹⁷Jayŋgol ngeendam ma ɓuran koo naaŋge boo, nyiɓre haa ngonɗa laatoto bana jayŋgol fajiri.

¹⁸Nden a heɓan hoolaare e tammunde, a aynaaɗo, a ɗaanoto bee de'ere.

¹⁹Walaa ɓillanɗo ma to a ɗon siwto, yimɓe ɗuuɗɓe boo ɗaɓɓitan yerduye ma.

²⁰Ammaa halluɓe coman tefugo ballal, kisndam walaa ngam maɓɓe, sey maayde tan, kanjum woni tammunde maɓɓe.