Read Fulfulde Ayuba 15 Bible Online

Ayuba 15 - Fulfulde bible

Ayuba 15

¹Nden Elifas Temaniijo wi'i:

²Hikmaajo jaaboto bee anndal henndu na? Henndu tan woni haa reedu maako na?

³A ɗon gooŋɗina hoore ma bee bolle meere na malla a ɗon wolwa haala ka walaa nafuuda?

⁴A ɗon wonna kulol ngol yimɓe mari heedi Allah, a ɗon haɗa dewal yeeso Allah boo.

⁵Halleende ɓernde ma ɗon wurto hunnduko ma, a ɗon suuɗa aybe ma bee bolle ƴoyɗe.

⁶Haala ma do'ata ma kiita, naa min, ko a wolwi fuu ɗon seedo a woodi aybe.

⁷Kadi ɓe ndanyi ma a afo yimɓe na? An aarti kooseehon kon fuu tageego na?

⁸A anndi sirriiji Allah na? An feere ma mari hikma na?

⁹Ɗume annduɗa minin min anndaa e ɗume paamɗa minin min paamaay?

¹⁰Min ngoodi ndotti'en caka amin, min ɗuuɗa duuɓi'en ko ɓuri baaba ma.

¹¹A ɗon numa de'itinki Allah bee bolle amin ɗelemɗe ɗe'e nafataa ma na?

¹²Ngam ɗume ɓernde ma ɗon sogge daayiiɗum? Ngam ɗume gite ma ɗon ma'a kalluɗum,

¹³haa tikkana koo Allah boo, haa acca bolle ɗe'e ngurto hunnduko?

¹⁴Ko woni neɗɗo haa o laato laaɓɗo tal? Ko woni danyaaɗo e debbo haa o laato adiliijo?

¹⁵Ndaa, Allah hoolataako koo malaa'ika'en, koo asamanji boo laaɓaay haa maako sam.

¹⁶Sakkomaa neɗɗo meereejo, bonniiɗo, baɗanɗo sooynde adilaaku foroy.

¹⁷Heɗitam, woodi ko mi yiɗi faamtingo ma. Haa mi anndine ko ngi'mi fuu,

¹⁸ko hikma'en anndini, ngaazini, ko ɓe keɓi haa kaakiraaɓe maɓɓe.

¹⁹Kamɓe tan, Allah hokkuno lesdi, jananno nastaay caka maɓɓe sam.

²⁰Bone tokkoto kalluɗo balɗe mum fuu, toonyotooɗo boo heɓataa duurugo.

²¹O ɗon nana hoolooji kulniiɗi tan, bonnoowo ɗon ukkano mo wakkati o ɗon nder jam.

²²Walaa tammunde daɗugo nyiɓɓuki, o cuɓaaɗo mbareego bee kaafahi.

²³O ɗon yiilo ngam tefugo nyaamdu. O anndi nyalaade nyiɓre ɗon reeni mo.

²⁴Tum ɓillaare e torra ɗon kulna mo bana laamiiɗo taaskaniiɗo haɓre.

²⁵Ngam o ɓaŋgti juŋngo dow Allah maako, o hulaay waɗugo tuurtol dow Baawɗo.

²⁶O lettiiɗo konanɗo koo Allah boo, njaajirka wawarde[9] maako faddoto mo.

²⁷Yeeso maako fuu ɓellere, o ɗon fayi, buttuli maako keewi ɓellere.

²⁸O ɗon jooɗi nder gure ɗe o nyaami ɗum, haa nder cuuɗi ɗi goɗɗo nastataa sam, ammaa konne'en ngibbinan cuuɗi man.

²⁹Risku maako fuu halkan, duurataa sam, maral maako yaajataa dow lesdi sam.

³⁰Nyiɓre waran, o heɓataa daɗugo, lice maako fuu njooran ngam yiite, poofɗe hunnduko Allah mbiftan mo.

³¹To o hoolake esto e rikici, nden o walaa mbarjaari, sey rikici.

³²Diga wakkati siwaa o ɗaylata, lice maako meetataa wilititgo.

³³O ɗon sammina kecce bana inabohi, o ɗon sammina pinndi bana jaytunhi.

³⁴Mooɓre halluɓe fuu, walaa danygol sam, cuuɗi zammba'en boo, yiite nyaaman ɗi.

³⁵Tum ɓe nufoto sarru e kalluɗi, deeɗi maɓɓe ɗon ɓenndina rikici.