Read Fulfulde Ayuba 16 Bible Online

Ayuba 16 - Fulfulde bible

Ayuba 16

²Nde ɗuuɗɗum mi nani irin bolle ɗe'e, onon fuu on de'itinooɓe mettuɓe.

³Walaa timmoode sam haa bolle ma meereeje ɗe'e na? Malla ɗume ɗon ummine haa njaaboɗa?

⁴To on ndarake jonta haa ndariimi, nden kam min boo mi wi'an on ko mbi'ɗon yam. Mi welnan bolle am dow mooɗon fuu, mi yiilnanno hoore dow mooɗon boo.

⁵Mi semmbiɗinanno on bee bolle am, bolle am koynananno on torraaji mon.

⁶To mi wolwi, ɗum haɗataa torraaji am. Koo mi jeeɗi boo, naawɗum daayataako yam.

⁷Ammaa jonta, Allah tampini yam, o nattini taariiɓe yam fuu.

⁸An a naŋngi yam, nyawu ɗon nyaama ɓanndu am, ɗum seedamku ngu'u waŋginta aybeeji am.

⁹Allah ɓerni masin, o ɗon seekammi, o ɗon hirƴindira nyii'e, o ɗon honammi, o ɗon furta gite, o ɗon hulnammi.

¹⁰Yimɓe ɗon maɓɓiti kunnduɗe, ɓe ɗon telɓanammi, ɓe ɗon maarammi dow galaŋge, ɓe ɗon mooɓo dow am, ɓe ɗon kaɓɓa dabare.

¹¹Allah nastini yam nder juuɗe ɓikkoy, kaŋko yerɓi yam haa mi nasta juuɗe halluɓe.

¹²Saa'i mi ɗon de'i, Allah wari, dofli yam, kaŋko naŋngi yam daande, nden o ɗeɗɗi yam, o fiɗi yam bee kuri maako.

¹³Kuri ɗi'i taari yam, bilaa enɗam o ɗon sumpita ɓooƴe am, haa dow lesdi o waanjata haahaande am.

¹⁴Ceekli ɗuuɗɗi o waɗani yam haa ɓanndu, bana konoowo, o ɗon hippammi.

¹⁵Mi ɗon ɓorni limce buhuuje ngam mettamɓeram, haa mbulwuldi mi sujidi bee tiinde am.

¹⁶Kayto, gite am purɗi daliila bojji, nyiɓre nyiɓɓunde ɗon sudda laral gite am,

¹⁷alhaali boo toonyaare walaa haa nder newre am, sey laaɓeeŋga tan woni nder do'aaje am.

¹⁸Lesdi, taa suddu ƴiiƴam am! Bojji am boo nane foroy!

¹⁹Ammaa jonta mi woodi ceedoowo haa asama, mi woodi ceettoowo haa dow.

²⁰Soobiraaɓe am, kamɓe ɓe ɗon njancammi, mi ɗon tijjo heedi Allah am koo to gite am ɗon keewi gonɗi.

²¹O laato gooŋɗinoowo hakkunde am e Allah, hakkunde goɗɗo e soobaajo mum,

²²ngam duuɓi ngeendam am luttani yam seɗɗa non, nden mi tokkoto laawol, mi wartataa sam.