Read Fulfulde Ayuba 2 Bible Online

Ayuba 2 - Fulfulde bible

Ayuba 2

¹Nyannde feere ɓiɓɓe Allah[4] ngari haa ndaro yeeso Jawmiraawo. Sayɗaanu boo wari, darodi bee maɓɓe.

²Jawmiraawo ƴami mo: “Diga toy ngarɗaa?” Sayɗaanu jaabi: “Mi yiiloyi koo toy haa duniyaaru.”

³Jawmiraawo wi'i mo: “A hakkilani jaggiiɗo am Ayuba na? Irin maako walaa haa duniyaaru, o gooŋgaajo, kulɗo yam, daayiiɗo halleende. An yerɓi yam ukkango mo torraaji meere. Ammaa kaŋko, o ɗon tabiti nder gooŋgaaku tawon.”

⁴Sayɗaanu jaabi: “Laral ngam laral! Ko neɗɗo mari fuu, o hokkan ɗum ngam hisnugo yoŋki maako.

⁵Ammaa to a forti juŋngo ma, a naawni ɓanndu maako, nden kam o huɗete bee baŋguɗum!”

⁶Jawmiraawo wi'i Sayɗaanu: “Ndaa mo haa juŋngo ma, ammaa aynu yoŋki maako!”

⁷Sayɗaanu dilli. O nyawni Ayuba ɓuule kalluɗe diga jaaɓruɗe haa hoore.

⁸Ayuba jooɗi nder ndoondi, hoo'i heeɗo, ɗon nyaanyoro.

⁹Debbo maako wi'i mo: “Haa jonta a ɗon tabiti nder adilaaku. Huɗ Allah, nden maaya!”

¹⁰Ammaa Ayuba wi'i mo: “A ɗon wolwa bana debbo paataaɗo! En ɗon njaɓa hayru haa Allah, ngam ɗume sarru kam en njaɓataa?” Nder kuuje ɗe'e fuu, Ayuba waɗaay hakke dow Allah nder boliiɗe muuɗum.

¹¹Soobiraaɓe Ayuba tato nani haala sarru ngu heɓi mo fuu. Ɓe ngari, koo moy diga nokkuure muuɗum: Elifas Temaniijo e Bildad Suhiijo e Cofar Na'amatiijo. Ɓe narri, ɓe ngari siŋkango mo e de'itingo mo.

¹²Nde ɓe eewi mo diga daayiiɗum, ɓe annditaay mo. Ɓe towni sawtu, ɓe mboyi, ɓe ceeki alkibbaaje maɓɓe, ɓe ukki collaaje dow ko'e maɓɓe heedi asama.

¹³Nden ɓe njooɗodi bee maako haa lesdi, nyalawmaaje joweeɗiɗi e jemmaaje joweeɗiɗi. Koo gooto maɓɓe wolwanaay mo, ngam ɓe ngi'i torra maako saati masin.