Read Fulfulde Ayuba 29 Bible Online

Ayuba 29 - Fulfulde bible

Ayuba 29

¹Ayuba tokkitini haala muuɗum, wi'i:

²To mi laatakeno bana naane, bana nyalɗe ɗe Allah ɗonno ayna yam,

³saa'i pittirla maako ɗonno yaynana yam, mi ɗonno saaloro nyiɓre bee jayŋgol man,

⁴bana laatiimino nder balɗe sukaaku am, saa'i Allah ɗonno woonana saare am,

⁵saa'i Baawɗo ɗonno wondi bee am, saa'i ɓiɓɓe am fuu ɗonno taari yam,

⁶saa'i kosam ɗonno ɗuuɗi haa na'i am, nebbam ɗuuɗɗam ɗonno wurto jaytunje am.

⁷Nde dawrooɓe ɗonno mooɓto nder wuro am, caka maɓɓe mi woodino joonde am,

⁸saa'i suka'en ngi'no yam, ɗonno lorto, non boo ndotti'en ɗonno ummo ndaro.

⁹Koo ardiiɓe boo naŋgtino e yeewtugo, ɓe ɗonno mballina juŋngo dow hunnduko.

¹⁰Mawɓe tedduɓe fuu accino wolwugo, ɗemɗe maɓɓe ɗonno takko nder kunnduɗe.

¹¹Koo moy nanino yam, maŋgtino mbooɗeeŋga am. Koo moy yi'no yam, mantino yam.

¹²Ngam nde laafuɗo wooki, mi wallino mo, non atiime'en sooyɓe walliinde boo.

¹³Mi heɓino barka haa yimɓe torriiɓe fuu, mi seynino rewɓe yurumɓe boo.

¹⁴Mi ɓornino adilaaku bana limce am, meetaleewol e jaage, non gooŋgaaku am.

¹⁵Bana gite laatinoomi haa bumɗo fuu, bana kosɗe laatinoomi haa boosɗo fuu.

¹⁶Baabiraawo laatinoomi haa talaka'en, kiita yimɓe jananɓe, mi linyino ka.

¹⁷I'al galaŋgal kalluɗo mi sampiti, ko o naŋngi bee nyii'e boo, mi hisni.

¹⁸Non mi tammi: Mi maayan nder saɓɓo am, balɗe am ɗuuɗan bana njaareendi,

¹⁹heedi ndiyam mi juttina ɗaɗi am, jemma fuu saawawre dow lice am,

²⁰koo ndey fuu tedduŋgal hoore am hesɗita, tum lagaawal nder juŋngo am semmbiɗa.

²¹Yimɓe nanɓe yam fuu ɗon keɗito, ɓe ɗon njeeɗi ngam nanugo sawariiji am.

²²Ɓaawo mbolwumi, walaa mo waaboto sam, bana toɓo dow maɓɓe, non bolle am.

²³Yimɓe keppani yam bana nduŋngu non, yimɓe ceyori yam bana iyeende ɓaawoore.

²⁴Nde ɓe ngalaa hoolaare, mi moosani ɓe, koo ndey yeeso am yayni, ɓe nde'iti.

²⁵Min mi suɓani koo moy fuu laawol mum, bana laamiiɗo jooɗiiɗo nder mooɓre mum. Min mi tiɗɗini ɓerɗe ta'aaɗe.