Read Fulfulde Ayuba 32 Bible Online

Ayuba 32 - Fulfulde bible

Ayuba 32

¹Yimɓe tato go acci jaabaago Ayuba, ngam o laari hoore maako o adiliijo.

²Ammaa Elihu ɓii Barakeyel Busiijo, goɗɗo asŋgol Ram, tikki. O tikkani Ayuba mo adilini hoore mum, feli Allah.

³O tikkani boo sooba'en Ayuba tato go, ngam ɓe keɓaay no ɓe njaaboro Ayuba, ammaa ɓe aybini mo.

⁴Elihu munyino wolwango Ayuba, ngam kamɓe ɓe ɓuri mo duuɓi.

⁵Ammaa nde o yi'i yimɓe tato go anndaa no njaaborto, o tikki.

⁶Nden o fuɗɗi wolwugo, o wi'i: Min mi famɗa-duuɓiijo, onon on ndottidi, kanjum waɗi mi miiji, mi huli wi'ugo on ko anndumi.

⁷Mi tammino: “Ndottaaku mon ardoto, ɗuuɗal duuɓi mon boo anndina hikma.”

⁸Ammaa gooŋga kam, ɗum Ruuhu, ɗum poofɗe Allah Baawɗo hokkata neɗɗo hakkiilo.

⁹Ɗuuɗal duuɓi laatintaa goɗɗo hikmaajo, kiita ngooŋɗuka boo iwataa haa ndotti'en.

¹⁰Ngam maajum mbi'mi, naneeɗam onon boo, acce min boo mi waŋgina anndal am.

¹¹Ndaa, mi reeni haa mi nana bolle mon, mi ɗon heɗito bolle hakkiilo mon, haa to on linyi ko mbolwuɗon dow maako,

¹²saa'i maajum mi nani, mi hakkili. Ammaa walaa mo darni Ayuba nder bolle mum, walaa jaabiiɗo mo laaɓɗum dow haala ka'a.

¹³Taa mbi'e on keɓdi hakkiilo fuu. Walaa neɗɗo do'ata mo, sey Allah tan.

¹⁴Naa haa am o wolwani, mi jaabataako mo bana on njaabori mo.

¹⁵Ɓe kultori, ɓe njaabaaki! Ɓe anndaa no ɓe njaaborto.

¹⁶Ammaa min, mi reeni, nde ɓe acci wolwugo, ɓe njeeɗi, ɓe njaabataako,

¹⁷nden kam ɗum wakkati haa mi wolwa min boo, acce min boo mi waŋgina anndal am.

¹⁸Min kam, bolle ɗuuɗɗe mi yiɗi wolwugo, ruuhu ngonŋgu nder am ɗon doolammi wolwugo.

¹⁹Bana inaboojam ɓennduɗam seekirta kanyakanyaawu[28], non numooji am ceekirta ɓernde am.

²⁰Sey mi wolwa haa ɓernde am de'ita. Jonta puɗɗanmi jaabaago Ayuba.

²¹Mi welnataa bolle am daliila goɗɗo, mi jiŋngataa koo moye bee bolle am.

²²Mi anndaa welnugo bolle, mi yiɗaa sam, ngam taa tagɗo yam wara hiito yam bee jaawal.