Read Fulfulde Ayuba 38 Bible Online

Ayuba 38 - Fulfulde bible

Ayuba 38

¹Nden Jawmiraawo gonɗo nder henndu saatundu jaabi Ayuba, wi'i:

²An a moy haa a hallina anniyaaji am bee bolle paataaɗe?

³Sey a taasko, a daro bana gorko! Mi ƴamete, sey a jaabo yam.

⁴Nde mi jo'ina duniyaaru, a ɗonno toy? To a mari hakkiilo, sey a yeccammi.

⁵Moy waɗi darɗe maaru, a anndi mo na? Moy dasi poondirgol dow maaru?

⁶Haa dow ɗume caɓɓaaje maaru mbaali? Moy jo'ini hayre toldu[31] maaru?

⁷Koode baɓɓol fuu ngimi nder saa'iire man, ɓiɓɓe Allah[32] fuu mbelmbelti bee seyo.

⁸Malla moy maɓɓi mbeela fuu bee dammuɗe, nde nga ɓuli, nga wurti reedu lesdi ndi'i?

⁹Min mi ɓorni nga duule, mi saawi nga nder duule ɓaleeje.

¹⁰Nde mi ta'ani mbeela maajum keeri mum, mbaɗmi jamɗe ngam falugo pareeje mum.

¹¹Mbi'mi ɗum: “A yottoto haa ɗo! A saalataako ɗo! Ƴuuge maaɗa ƴaggiiɗe, sey ɗe nde'a ɗo.”

¹²An a meeɗi umrugo garki subaha na? A meeɗi anndingo beɗgol pellel muuɗum,

¹³haa ngol naŋnga duniyaaru ndu'u haa gawarle, haa dow maaru ngol fiɗɗa yimɓe halluɓe na?

¹⁴Jayŋgol naaŋge ɗon waŋgina kooseeje fuu, bana nyobborle limce, non ɗe ndarorto.

¹⁵Jayŋgol maajum ɗon sakla yimɓe halluɓe, ngam ngol haɗan ɓe huuwugo kuuɗe kalluɗe.

¹⁶An a meeɗi yottaago ɓulli mbeela na? An a meeɗi yiilaago les luggeeŋga na?

¹⁷Jolɗe waade ɗe baŋguɗe haa maaɗa na? Malla dammuɗe maayde ngi'ɗa na?

¹⁸An a faami njaajirka duniyaaru na? Sey a anndina yam to a anndi!

¹⁹Toy jayŋgol jooɗoto? Toy pellel laatiiŋgel joonde nyiɓre boo?

²⁰An a hollan ɗum keerol laawol maajum na? An a umran ɗum hootugo haa saare na?

²¹Kay, a anndi ɗum fuu ngam ɗuuɗal duuɓi ma, saa'i tagmi duniyaaru, an boo a danyaaɗo.

²²Siga iyeende hattiniinde, an a nasti na? Siga mallimallooje boo a yi'i na?

²³Min mi resi ɗe fuu ngam saa'i sarru, ngam saa'iije konuuji e kaɓe.

²⁴Toy laawol nokkuure naaŋge fuɗata malla pellel ngel henndu fuuna iwata?

²⁵Moy seekanta ndiyam iyeende ilduɗe? Moy seekata laawol ngam ma'ere e felmaaŋgo?

²⁶Moy toɓnata iyeende koo dow ladde, haa nokkuure nde walaa neɗɗo jooɗoto?

²⁷Moy ittanta ladde maajum ɗomka mum? Moy fuɗnata huɗo e haakooji ton?

²⁸Kadi iyeende man woodi baabiraawo na? Malla moy waɗi baade saawawre?

²⁹Kadi moy laati daada kattiniiɗam fuu? Moy ɓesni saawawre hattiniinde?

³⁰Jaaŋgol ukkanto ndiyam haa ɗam hattino bana hayre, mbeela saatan bana lesdi.

³¹Koode ɗaccuki kaɓɓirta bee ɓoggi na? Malla kaɓɓorli koode dulooje piistata?

³²An a eeŋginan burjuuji fuu bee saa'i man na? An a wurtinan koode iliiyuuje na?

³³An a anndi umrooje asamanji na? An a hokkan ɗi laamu dow duniyaaru na?

³⁴Sawtu maaɗa, a townan mo haa duule na, ilam wara dow maaɗa, ndiyam sudde na?

³⁵An umrata ma'e ma'a na? Ɗe ɗon nootane: “Na'am” na?

³⁶Moy hokkata dumaral hakkiilo? Moy waɗi asgumri[33] heɓa anndal?

³⁷Moy limata duule fuu bee hikma mum? Moy hersata bulki asama,

³⁸haa mbulwuldi tamo, ɓoɗe lesdi fuu takkotira gootel?

³⁹An a heɓnan mbarooga nyaamdu muuɗum na? An a humtanan ɓikkoy maaga haaje na,

⁴⁰to koy ndeeni, koy ndoŋgini nder lowi maakoy, to koy mbaaltani keɓal caka guuɓe?

⁴¹Moy hokkata leekuwal ko ngal nyaamata, to ɓikkoy maagal ngooki heedi Allah, koy ɗon ngiilo ngam walaa ko koy nyaamata?