Read Fulfulde Ayuba 4 Bible Online

Ayuba 4 - Fulfulde bible

Ayuba 4

¹Elifas Temaniijo wi'i:

²To min mbolwani ma, ɗum mettinte na? Ammaa moy waawata naŋgtugo bolle mum?

³Ndaa, a faamtini ɗuuɗɓe, a walliti boo juuɗe tampuɗe.

⁴Koo moy fergi, bee bolle ma umminɗa mo, koppi tampuɗi boo, an a haftini ɗi.

⁵Nde ɗum heɓi ma jonta, ɗum mettini ma, nde ɗum ukki dow maaɗa, a wemmboto na?

⁶Kulol Allah laataaki hoolaare ma na? Malla kuuɗe ma adiliije laataaki tammunde ma?

⁷Siftor, cooyɗo aybeeji meeɗi halkugo na malla woodi gooŋgaajo meeɗɗo nattugo?

⁸Ndaa ko ngi'mi: Demoowo zunuuba foroy, koo aawoowo toonyaare, o sodan ɗum boo.

⁹Poofɗe Allah men, kanje kalkata ɓe, henndu tikkere maako boo timminan ɓe.

¹⁰Ɓe ɗon ubbo bana cirgu, bana mbarooga boo. Nyii'e mbarookoy boo ngewaama fuu.

¹¹Mbarooga ɗon halka, walaa jaɓtiiru sam, non boo ɓikkoy mbarooga fuu caŋkititto.

¹²Mi nani wolde sirriire, noppi am nani ɗum bana sofndaaŋgo.

¹³Ɗum gi'aaɗum, ɗum hulni yam jemma, saa'i yimɓe ɗon nder ɗoyŋgol tedduŋgol.

¹⁴Kulol ukkani yam, kultoreeŋgol nasti i'e am fuu haa ɗe ndimmbi.

¹⁵Huunde saali dow am bana henndu, suufu ɓanndu am dari ngam kulol.

¹⁶Goɗɗo ummi, min kam mi anndaa mo, yeeso am o ɗon dari, ɗon jeeɗi. Nden mi nani sawtu maako:

¹⁷“Neɗɗo maayanɗo ɓuran Allah adilaaku na? Goɗɗo ɓuran tagɗo ɗum laaɓugo na?

¹⁸Jawmiraawo hoolaaki koo malaa'ika'en muuɗum, o ɗon fela faataare jagganooɓe mo,

¹⁹sakko yimɓe tagaaɓe bee loope, laatiiɓe mbulwuldi, bana mooƴu meere ɓe namrete.

²⁰Diga fajiri haa asiri, ɓe pusete, haa foroy ɓe kalkan. Walaa mo hakkilanta ɗum.

²¹To o ta'i poofɗe maɓɓe boo, yimɓe maayan bilaa hikma.”