Read Fulfulde Ayuba 41 Bible Online

Ayuba 41 - Fulfulde bible

Ayuba 41

¹Anndu, to goɗɗo numi o jaaloto ngilanŋgeewa, o sargi hoore maako. Goɗɗo hultoran, do'oto to yi'i nga tan.

²Walaa yoora-ɓerndeejo tikkinanɗo nga, walaa gorko cemmbiɗɗo dartantooɗo nga.

³Moy waɗi konu bee maaga, nden o dilli jam? Irin maako les asama fuu walaa sam!

⁴Sey mi anndine haala terɗe maaga fuu, maŋngu maaga cemmbiɗŋgu, non boo ŋarol maaga.[35]

⁵Moy seekata limce maaga, ɓorta nga? Cowol sulkewol maaga, moy nastata?

⁶Kadi hunnduko maaga, moy maɓɓiti ko? Moy diwnataa to yi'i nyii'e maaga?

⁷Ɓaawo maaga, ɗum jabbi ndarganaaje[36], ɗe ɗon kawriti kab bana bee taari.

⁸Gootal gootal ɗe njokkindiri, caka maaje, foofaaŋgo saalataako sam.

⁹Gootal gootal ɗe takkotiri caatuɗum, ɗe ɗon njogotiri booɗɗum, ɗe ceedataa sam.

¹⁰To nga isli, annoora ɗon waŋga, gite maaga ɗon njayna bana naaŋge.

¹¹Haa nder hunnduko maaga jame ngurtoto, pete yiite ɗon njammito diga hunnduko.

¹²Kine maaga ɗon cuura cuurɗe tekkuɗe, bana geene kuɓɓaaɗe haa les defrude.

¹³Poofɗe maaga kuɓɓan ƴulɓe yiite, ɗemŋgal yiite ɗon wurto haa nder hunnduko.

¹⁴Kayto! Hoɓɓudu maaga ɓuri semmbiɗgo. Koo moy fotti bee maaga, sey o hultora.

¹⁵Kusel maaga haa buttuli hawtidi, ngel cemmbiɗŋgel masin, ngel dimmbataako.

¹⁶Bana hayre, non ɓernde maaga saatiri, nde ɗon saati bana namrude.

¹⁷To nga ummake, ɗowanteeɓe kultoran, ƴuuge mbeela boo ndoggan yeeso kuuŋga man.

¹⁸A heɓataa a naawna nga bee kaafahi malla bee labbo e jaaral malla bee kurol boo.

¹⁹Njamndi fuu, nga ɗon laara ndi bana tiitiiho, njamndi mboɗeeri boo kal-kal bee leggal nyolŋgal.

²⁰To a fiɗi kuri, nga doggataa sam to a fiɗi nga bee kaa'e, ɗe laatanto nga kuɗoy tan.

²¹Nga ɗon laara wandayre bana huɗo non. To a sakkini labbo boo, nga jalan ɗum.

²²Haa les reedu nga woodi kuuje bana keeɗe, kanje ceekata loope haa nga yehi fuu.

²³Nga ɗon ɓulna luggeeŋga bana defugo, mbeela waywa bana nebbam nder fayannde.

²⁴Haa nga saali, a yi'an laawol jaynuŋgol, a ɗon nanndina nguufo man bee dandanndol.

²⁵Haa duniyaaru fuu walaa irin maaga sam, nga tagaama nga jooɗo bilaa kulol sam.

²⁶Bee ɓaŋgaare nga laardata ɓaŋgiiɗum fuu, nga laamiiɗo dabbaaji mawnitiiɗi fuu.