Read Fulfulde Ayuba 5 Bible Online

Ayuba 5 - Fulfulde bible

Ayuba 5

¹Kadi, ewna! Moy jaaboto ma? Haa seniiɓe boo, moy ewnotooɗa?

²Ngam mettamɓeram mbaran paataaɗo, kaajal nattinan cooyɗo hakkiilo.

³Nde mi yi'i paataaɗo ɗon tabito, law mi naali saare maako, mi wi'i:

⁴Taa ɓiɓɓe maako keɓa walliinde! Ɓe hiitaaɓe haa nastirde wuro[6], ammaa goɗɗo kisnanɗo ɓe walaa.

⁵Weelaaɓe nyaama ƴaamnde maako, ɓe kooca nde koo caka gi'e, talaka'en boo njaɓta mo jawdi maako.

⁶Aa'a, sarru iwataa haa mbulwuldi, non boo torra fuɗataa diga lesdi.

⁷Ammaa neɗɗo danyaama ngam torra, bana feetere yiite ngam fiira.

⁸To min kam, mi ɗakkotiranno bee Allah, mi yahranno haala am haa maako.

⁹O ɗon huuwa kuuɗe mawɗe, goɗɗo waawataa faamugo ɗe, o ɗon huuwa kuuɗe kayɗiniiɗe ɗe ngalaa limgal.

¹⁰O ɗon toɓna iyeende dow lesdi, o ɗon nelda ndiyam boo dow gese,

¹¹o ɗon ɓaŋgta leestiiɓe, o ɗon seyna sunaaɓe.

¹²O ɗon nattina dabareeji ƴoyɓe, ngam taa ɓe keɓa jaalorgal.

¹³O ɗon naŋnga hikma'en nder ƴoyre maɓɓe, o ɗon majjina anniya faasiki'en.

¹⁴Nyalawma ɓe kawran bee nyiɓre, haa naaŋge ɓe maman bana jemma.

¹⁵E kaafahi o hisnan bukaaɗo, o wurtinan mo nder juŋngo baawɗo.

¹⁶Non tammunde ɗon ngam talakaajo, ammaa sooynde adilaaku maɓɓan mo hunnduko.

¹⁷Mo Allah feli heɓi barka! Ngam maajum taa sala elto Allah Baawɗo!

¹⁸Ngam kaŋko naawnata, kaŋko haɓɓata huuduure. O fiyan, nden juuɗe maako boo kurga.

¹⁹Foroy o hisnete e ɓillaaje, to sarru waɗi, ngu meemataa ma.

²⁰To weelo waɗi, o hisnete maayde, nder konu boo o hisnete diga kaafahi.

²¹A hisan e bolle tufleejo. A hulataa sam to halkere wari.

²²A jalan dow bonnuki e weelo, a marataa kulol ngam kuuje ladde.

²³A reman gese, ɗe marataa kaa'e, a woodi sulhu bee kuuje ladde.

²⁴A yi'an saare ma waɗan barka, a liman baali ma fuu, ɗi ngonan ɗi fuu.

²⁵A yi'an ɓiɓɓe ma ɗuuɗan bana huɗo ngesa.

²⁶A nastan yenaande bee ndottaaku bana waagaare alkamaari wakkati ƴaamle.

²⁷Min linyi ɗum fuu, nonnon ɗum wa'i. An, nan ɗum, anndu ɗum bee hoore maaɗa!