Read Fulfulde Ayuba 6 Bible Online

Ayuba 6 - Fulfulde bible

Ayuba 6

¹Nden Ayuba jaabi, wi'i:

²Asee! To goɗɗo foondi metteeŋga am, to o waati sarruuji am dow awnorɗum,

³ɗum ɓuran njaareendi maayo fuu teddugo, ngam maajum mi numataa bolle am.

⁴Ndaa, Allah Baawɗo tufi yam bee kuri mum, mi tahi dajje maaji. Kulniiɗum iwɗum diga Allah ɗon honammi.

⁵To huɗo ɗon yeeso wamnde ladde, nde ooloto na? To nyaamdu ɗon, nagge woodoto na?

⁶Goɗɗo nyaaman lakasɗum ɗum walaa mannda na? Dakam ɗon nder daneejum yeeraande heccere na?

⁷Ko mi sali meemugo laatake nyaamdu am, koo to ndu nyiddundu boo.

⁸Mi yiɗno tornde am jaɓe, Allah duŋanammi ko tammiimi!

⁹Ɗum fottana Allah o namammi. O forta juŋngo, o ta'ammi.

¹⁰Mi heɓanno de'itinki, mi seyanno koo nder boneeji am naawɗi ɗi'i. Mi yeddaay bolle Ceniiɗo sam.

¹¹Ammaa semmbe am ngam tammaago luttaay fahin! Ɗume munyal am nafatammi, mi walaa tammunde dow garanɗum fahin!

¹²Mi hayre haa mi munyana koo ɗume fuu na? Ɓanndu am saati bana njamndi mboɗeeri na?

¹³Min mi walaa walliinde sam, mi walaa ballal koo seɗɗa.

¹⁴Mo ɗon nder torra mari haaje walliinde sooba mum, koo to o accuɗo hulugo Allah Baawɗo boo.

¹⁵Bana maayo yoorngo, bana maaje ɓeeɓɗe, non deerɗiraaɓe am toski yam.

¹⁶Maaje ɗe'e keewan koo ndey ndiyam mooɓoto, to mallimallooje fuu ɓolwi,

¹⁷ammaa saa'i ceeɗu ɗe ɓeeɓan, to gulɗum waɗi, ɗe njooran.

¹⁸Mooɓre filooɓe ɗon ɗaɓɓita ndiyam ton, nde nastan nder ladde, nde majjan ton.

¹⁹Mooɓre filooɓe warannde diga Tema e Saba fuu ɗon ɗaɓɓita ɗe, ɗon tammoro ɗe.

²⁰Ammaa nde semtan daliila hoolaare man, to nde yottake ton, tammunde maare ittoto.

²¹Nonnon on laatani yam on fuu. Nde ngi'ɗon kulniiɗum, on kultori.

²²Mi wi'i on ndokkammi huunde na, on ndokkammi jawdi ndi marɗon na,

²³on kisnammi juŋngo ɓilloowo na, on coottammi diga juŋngo toonyoowo na?

²⁴On paamnammi, nden kam mi jeeɗoto. Kolleeɗam haa mi woofi.

²⁵Bolle gooŋɗuɗe naawan ɓernde na? Ko mbi'ɗon nafan ɗume?

²⁶Ngam bolle am mbaɗɗon feloore na? Mi woyi ngam torra, ɗum haala nder henndu na?

²⁷On ɗon mbaɗa kur'u koo dow atiimeejo, on ɗon coorra koo soobaajo mon!

²⁸Kadi sey on ndaarammi! Haa gite mon mbolwanmi fewre na?

²⁹Jonta, lorte! Taa nume kalluɗum sam! Lorte! Haa jonta mi ɗon nder adilaaku am!

³⁰Kadi fewre ɗon nder hunnduko am na? Mi anndaa ko woni halleende na?