Read Fulfulde Ayuba 8 Bible Online

Ayuba 8 - Fulfulde bible

Ayuba 8

¹Nden Bildad Suhiijo wi'i:

²Ndey accata wolwugo irin maajum? Haa ndey accata wolwugo bolle caatuɗe bana henndu saatundu?

³A tammi Allah sannji dookaaji kiita na? A tammi Allah Baawɗo wayliti kiita ngooŋɗuka na?

⁴To ɓiɓɓe ma mbaɗi hakke dow Allah, ɓe keɓi ngeenaari zunuuba maɓɓe.

⁵Ammaa an, to a ɗakkotiran bee Allah, to a toroto Allah Baawɗo,

⁶to a walaa feloore, to a darnuɗo, fakat o ummoto haa o walle, o mo'ina joonde ma bana naane.

⁷Nden ndaarata fuɗɗam ma bana peetum, haa timmoode maaɗa a maran ɗuuɗɗum.

⁸Sey a heɗito yimɓe ɓooyma, ko kaakiraaɓe maɓɓe keɓti, anndu ɗum!

⁹Enen, en neeɓaay haa duniyaaru ndu'u! Walaa ko en anndi, balɗe meeɗen haa lesdi, ɗum ɗowdi tan.

¹⁰Ammaa kamɓe, ɓe ekkitinte, ɓe anndinte ɗum ko ɓe anndi bee kirseeku maɓɓe:

¹¹Kewe mawnan to walaa waalowol na? Tolooje mawnan to ndiyam walaa na?

¹²Kanje ɗe aartan koo huɗo yoorugo, koo ɗe kecce, koo walaa pe'uɗo ɗe.

¹³Kanjum heɓata yejjitanɓe Allah, non tammunde kalluɗo halkirta.

¹⁴Haala tammunde maako wonnoto, nde nanndi bee cannyudi.

¹⁵To o ɓaarake suudu maako, ndu yibban, to o feɗi dow maaru, ndu yibban.

¹⁶Bana lekki keewki ndiyam gonki haa naaŋge, lice maaki ɗon caalo jarne fuu,

¹⁷ɗaɗi maaki ɗon laya caka waagaare kaa'e, caka kaa'e ki yiɗi naŋgtugo.

¹⁸To ɓe ɗoofi ki diga pellel man, pellel man yeddan ki, wi'an: “Mi meeɗaay yi'ugo ki sam.”

¹⁹Kanjum tan woni seyo maaki fuu, haa pellel maaki boo, leɗɗe goɗɗe puɗan.

²⁰Aa'a, Allah wudintaa adiliijo. O wallataa kalluɗo.

²¹Allah wartiran seyo ɓernde ma, haa a jala, a heewa welwelo.

²²Ammaa wanyɓe ma keewan semteende, cuuɗi halluɓe mbilan.