Read Fulfulde Jabuura 104 Bible Online

Jabuura 104 - Fulfulde bible

Jabuura 104

¹Sey mi maŋgta Jawmiraawo! Yaa Jawmiraawo Allah am, a mawɗo masin, a ɗon ɓorni maŋngu e daraja.

²A ɗon moji annoora, a we'iti asamanji bana laymaaru.

³A jo'ini cuuɗi ma dowji dow ndiyamji asama, a laatini duule moota ma, a ɗon yaha dow henndu.

⁴A laatini keni nelaaɓe ma, ɗemɗe yiite boo jagganooɓe ma.

⁵A tabitini lesdi dow caɓɓaaje maari, ngam taa ndi dimmbo sam.

⁶A suddi ndi bee ndiyam lugguɗam bana mojaare, ndiyamji towti dow kooseeje.

⁷Ammaa wakkati a telɓani ɗi, ɗi ndoggi, hoolo felmaaŋgo ma lorni ɗi ɓaawo.

⁸Ɗi mba'i kooseeje, ɗi njippi waadiiji, haa nokkuure nde ndokkuɗa ɗi.

⁹A waɗani ɗi keerol, taa ɗi ƴaɓɓo ngol, taa ɗi meeta suddugo lesdi.

¹⁰A ɗon ɓulna ceeɓooje, ɗe laato maaje, ndiyamji ɗon ila nder waadiiji caka kooseeje.

¹¹Ɗi ɗon njarna dabbaaji ladde fuu e bamɗe ladde ɗon ɗomɗita ton.

¹²Colli ɗon njooɗi kommbi maaje, ɗi ɗon ngima dow lice leɗɗe.

¹³A ɗon yarna kooseeje bee iyeele diga cuuɗi ma dowji, lesdi ɗon heewi nafuuda kuuɗe ma.

¹⁴A ɗon fuɗna huɗo ngam dabbaaji e ko ɓiɓɓe Aadama aawata haa lesdi ngam nyaamdu muuɗum'en.

¹⁵Nden inaboojam seyna ɓerɗe maɓɓe, nebbam ɗelkina geese maɓɓe, nyaamdu boo semmbiɗina ɓe.

¹⁶Leɗɗe Jawmiraawo, leɗɗe cemmbiɗɗe ɗe o jubi dow hooseere Libanon, ɗon cafta ndiyam.

¹⁷Colli ɗon mbaɗa caɓɓe muuɗum'en ton, ngaasiyoowal woodi saɓɓo mum dow caski.

¹⁸Be'i kooseeje ɗon dow kooseeje towɗe, jama-gudde boo haa nyukkorɗe caka tapaaje.

¹⁹A tagi lewru ngam anndingo yimɓe wakkatiiji, naaŋge anndi wakkati mutki mum.

²⁰A tagi nyiɓre. To jemma waɗi, kuuje laynde fuu ngurtoto.

²¹Barooɗe cemmbiɗɗe ubban, loohoto, ɗaɓɓitan nyaamdu ndu Allah hokkata ɗe.

²²To naaŋge fuɗi, ɗe nyukko, ɗe mbaalo nder lowi maaje.

²³Ammaa yimɓe ngurtoto ngam kuuɗe muuɗum'en, ɓe kuuwa haa maŋngariba.

²⁴Yaa Jawmiraawo, tagefooji ma ɗi ɗuuɗɗi masin! A tagri ɗi fuu bee hikma, duniyaaru fuu heewi mardi ma.

²⁵Ndaa mbeela maŋnga, njaasŋga, tagle ɗe ngalaa limgal, mawɗe e pamare ɗon ndimmbandimmbina nder maaga.

²⁶Koommbooje ɗon njaha nder maaga, non boo Lewiyatan nga tagɗa ngam fijugo nder maaga.

²⁷Tagefooji ɗi fuu ɗon marsori ma, haa ndokka ɗi nyaamdu nder wakkati haaje.

²⁸To a hokki ɗi, ɗi nyaaman, to a weeɗi juŋngo ma, ɗi kaaran.

²⁹To a wiirni gite ma, ɗi kultoran. To a naŋgti poofɗe maaji, ɗi mbaatan, ɗi ngartan mbulwuldi.

³⁰Ammaa to a hokki ɗi poofɗe, ɗi ngeeɗan, ɗi keewan lesdi.

³¹Tedduŋgal Jawmiraawo duumo, o seyoro kuuɗe maako!

³²To o laari lesdi, ndi dimmboto. To o meemi kooseeje, ɗe ngurtinan cuurka.

³³Min kam mi yimanan Jawmiraawo balɗe am fuu, mi maŋgtan Allah am yaake mi ɗon bee yoŋki!

³⁴Sey yimre am fottana mo, min boo mi seyoro mo!

³⁵Hakke'en cottuma e lesdi, halluɓe njinna! Sey mi maŋgta Jawmiraawo. Halleluya! [50]