Read Fulfulde Jabuura 115 Bible Online

Jabuura 115 - Fulfulde bible

Jabuura 115

¹Taa teddin min, yaa Jawmiraawo, taa teddin min, ammaa an feere ma tan mara tedduŋgal ngam daliila mbooɗeeŋga ma e gooŋgaaku ma.

²Ngam ɗume ummaatooje goɗɗe mbi'ata: “Toy Allah maɓɓe?”

³Allah men ɗon haa asama, o waɗan ko o yiɗi fuu.

⁴Labbi maɓɓe ɗi cardi e kaŋŋeeri, kuuwaaɗum juuɗe yimɓe.

⁵Ɗi ngoodi kunnduɗe, ammaa ɗi mbolwataa, ɗi ngoodi gite, ammaa ɗi ngi'ataa,

⁶ɗi ngoodi noppi, ammaa ɗi nanataa, ɗi ngoodi kine, ammaa ɗi luuɓnataako,

⁷ɗi ngoodi juuɗe, ammaa ɗi meemataa, ɗi ngoodi kosɗe, ammaa ɗi njahataa, walaa sonyo wurtoto diga kunnduɗe maaji.

⁸Waɗɓe ɗi nanndi bee maaji, non boo hooliiɓe ɗi fuu.

⁹Onon yimɓe Isra'iila, koole Jawmiraawo, kaŋko woni balloowo maɓɓe, o wawarde maɓɓe.

¹⁰Onon yimɓe danygol Haruna, koole Jawmiraawo, kaŋko woni balloowo maɓɓe, o wawarde maɓɓe.

¹¹Onon hulɓe Jawmiraawo, koole mo, kaŋko woni balloowo maɓɓe, o wawarde maɓɓe.

¹²Jawmiraawo yejjitaay en, o barkiɗinan en, o barkiɗinan yimɓe Isra'iila e danygol Haruna.

¹³O barkiɗinan hulɓe mo, mawɓe e leesɓe fuu.

¹⁴Jawmiraawo ɗuɗɗina on, onon e ɓiɓɓe mon.

¹⁵On barkiɗinaaɓe Jawmiraawo mo tagi asama e lesdi.

¹⁶Jawmiraawo feere mum mari asamanji, ammaa lesdi, o hokki ndi ɓiɓɓe Aadama.

¹⁷Maayɓe mbaawataa maŋgtugo Jawmiraawo, walaa koo gooto to nasti joonde maayɓe maŋgtata mo.

¹⁸Ammaa enen en maŋgtan Jawmiraawo diga jonta haa foroy! Halleluya!