Read Fulfulde Jabuura 139 Bible Online

Jabuura 139 - Fulfulde bible

Jabuura 139

¹Ngam kaliifaajo gime. Yimre Daawuda. Yaa Jawmiraawo, a linyi yam, a anndi yam.

²Koo mi ɗon jooɗi, koo mi ɗon dari, a anndi ɗum, a anndi numooji am diga daayiiɗum.

³Koo mi ɗon waanca, koo mi ɗon siwto, a ɗon linya ɗum, a anndi ko mbaɗanmi fuu.

⁴Hiddeko mi wolwa, yaa Jawmiraawo, a anndi ko mbi'anmi fuu!

⁵A ɗon taari yam yeeso e ɓaawo fuu, juŋngo ma ɗon faddammi.

⁶Anndal kaayeefiiwal nga'al saldori yam, ngal luggi masin, mi waawataa faamugo ngal.

⁷Toy ndaayotoomi bee Ruuhu ma? Toy ndaɗanmi gite ma?

⁸To mi eeŋgi haa asama, a ɗon ton. To mi we'iti nder joonde maayɓe boo, a ɗon ton.

⁹To mi fiiri haa keerol duniyaaru gal fuunaaŋge malla mi jooɗi haa nokkuure ɓurnde daayaago gal hiirnaaŋge,

¹⁰ton boo juŋngo ma ɗowatam, nyaamo ma jogoto yam.

¹¹Koo to mi wi'i: “Sey nyiɓre suddammi, jayŋgol taariiŋgol yam nyiɓɓa bana jemma”,

¹²Ammaa ngam maaɗa nyiɓre man nyiɓɓataa, koo jemma boo laatanto ma bana nyalawma, nyiɓre ma boo bana jayŋgol.

¹³An a tagi numo ɓernde am, a tafi yam nder reedu daada am.

¹⁴Mi yetti ma ngam mbaɗɗa mi kayniiɗo. Kuuɗe ma fuu ɗe kaayeefiije, mi anndi ɗum booɗɗum.

¹⁵I'e am cuuɗanaaki ma saa'i a tagammi nder cuuɗiiɗum, saa'i a tafi yam nder lugguɗum lesdi.

¹⁶A yi'i yam diga mi tafaakano. A aarti a winndi balɗe ɗe a ta'ani yam fuu nder deftere ma hiddeko arannde maaje fuɗɗa.

¹⁷Numooji ma caldori yam! Yaa Allah, limgal maaji ɗuuɗi masin!

¹⁸Ɗi ɓuri njaareendi ɗuuɗugo. Koo to mi numti haala ma fuu, mi waawataa faamdugo ka[55].

¹⁹Yaa Allah, mi yiɗi a mbara halluɓe ɓe'e, a daayna mbarooɓe ko'e ɓe'e bee am!

²⁰Ɓe ɗon kuuwtinira innde ma ngam zammbaago yimɓe, konne'en ma ewnoto nde meere.

²¹Yaa Jawmiraawo, mi ɗon wanya wanyɓe ma, tuurtuɓe dow ma laatani yam nyidduɓe!

²²Konne'en maaɗa ɓe konne'en am, mi ɗon wanya ɓe nganyŋgu caatuŋgu.

²³Linyam, yaa Jawmiraawo, wiɗita ɓernde am! Laarndam, anndu cakle am!

²⁴Laar laawol am, ngol kalluŋgol na? Ɗowam dow laawol duumiiŋgol.