Read Fulfulde Jabuura 22 Bible Online

Jabuura 22 - Fulfulde bible

Jabuura 22

¹Ngam kaliifaajo gime fodde daande “Lelwa wakkati baɓɓol”.[13] Yimre Daawuda.

²Yaa Allah am, yaa Allah am, ngam ɗume a wudini yam? Mi wooki ngam haa a hisnammi, ammaa a daayotiri bee am!

³Yaa Allah am, mi ɗon wookane nyalawma, a jaabataako. Mi ɗon wooka jemma boo, ammaa mi heɓataa siwtaare!

⁴Alhaali boo, an woni Ceniiɗo, a ɗon jooɗi dow leeso laamu ma, Isra'iila'en fuu ɗon ngimane maŋgtooje.

⁵Kaakiraaɓe amin ɗonno kooli ma, ɓe kooli ma, an boo a hisni ɓe.

⁶Ɓe ngookani ma, a hisni ɓe ɓillaare, ɓe kooli ma, an boo a semtinaay ɓe.

⁷Ammaa min mi ngilŋgu, naa mi ɓii-Aadamaajo. Yimɓe fuu ɗon kuɗammi, ɗon meeriɗinammi.

⁸Yi'ɓe yam fuu ɗon njancammi, ɗon njalammi, ɗon ndimmbina ko'e.

⁹Ɓe ɗon mbi'a: “Naa o hooli Jawmiraawo! Nden kam, o hisna mo kadi, nde nii o yiɗi mo!”

¹⁰An wurtini yam reedu daada am, an ayni yam jam diga mi ɗonno musina tawon.

¹¹A ɗon jogi yam diga danyeeki am, diga reedu daada am, an woni Allah am.

¹²Taa daaytu bee am, ngam ɓillaare ɓadake, walaa goɗɗo wallatammi!

¹³Konne'en semmbiɗɓe bana ga'i kalhali taari yam, mooɓre maɓɓe ɓiɗɗotiri dow am bana dabbaaji lesdi Baasan cemmbiɗɗi.

¹⁴Ɓe ɗon maɓɓita kunnduɗe maɓɓe bana barooɗe, ɓe ɗon ubba, ɓe ngiɗi seekugo yam.

¹⁵Semmbe am jinni, majji bana ndiyam ndufaaɗam haa lesdi. I'e am fuu cokkitake, ɓernde am ɓolwi nder reedu am bana taari.

¹⁶Kondondol am yoori bana fayannde loope yoornde, ɗemŋgal am ɗon takko nder hunnduko am, a wallini yam nder mbulwuldi bana maayɗo.

¹⁷Halluɓe taari yam, ɓe ɓiɗɗotiri dow am bana dawaaɗi. Ɓe cumpiti juuɗe am e kosɗe am.

¹⁸Mi foo'i, mi waawi limugo i'e am fuu, konne'en am ɗon cutammi, ɗon purkitammi.

¹⁹Ɓe ɗon cennda limce am hakkunde maɓɓe, ɓe ɗon mbaɗa kur'u ngam heɓtugo mo hoosata limce am.

²⁰Ammaa an, yaa Jawmiraawo, taa daayu bee am! An woni semmbe am, yaawɗa wallugo yam!

²¹Hisnam, taa kaafahi mbarammi! Hisnu yoŋki am diga dawaaɗi ɗi'i!

²²Hisnam hunnduko mbarooga, hisnam diga luwe bani! A jaabi yam!

²³Mi wooynan innde ma caka deerɗiraaɓe, mi maŋgtan innde ma nder mooɓtorde maɓɓe.

²⁴Onon hulɓe Jawmiraawo, maŋgte mo! Onon danygol Yaakubu fuu, teddine mo! Onon danygol Isra'iila fuu, ndiwne yeeso maako!

²⁵Ngam o yawaaki laafuɗo, o yawnaay laafere mum. O wiirnanaay mo gite, nde o wookani mo, o jaabi mo boo.

²⁶Yaa Jawmiraawo, haa maaɗa maŋgtooje am nder mooɓtorde mawnde iwi, yeeso hulɓe ma kebbinanmi togayeeje am.

²⁷Yaŋkiniiɓe nyaaman, kaaran. Ɗakkotiranɓe bee Jawmiraawo maŋgtan mo, ɓe ngeeɗa haa foroy!

²⁸Ummaatooje keeri duniyaaru fuu ciftoran Jawmiraawo, ɓe lortoto haa maako, le'i ummaatooje fuu cujidanan mo.

²⁹Ngam Jawmiraawo woni laamiiɗo, o ɗon laamano ummaatooje.

³⁰Marɓe baawɗe duniyaaru fuu nyaaman, ɓe cujidanan mo boo[14], maayanɓe fuu tugganan mo koppi, ɓe mbaawataa juttingo balɗe maɓɓe.

³¹Danygol maɓɓe jagganto Jawmiraawo. Yimɓe anndinan yidere warannde haala maako.

³²Ɓe anndinan ummaatoore nde siwaa danyeego kuuɗe adilaaku ɗe o huuwi.