Read Fulfulde Jabuura 25 Bible Online

Jabuura 25 - Fulfulde bible

Jabuura 25

¹Yimre Daawuda. Yaa Jawmiraawo, mi halfitini ma yoŋki am.

²Yaa Allah am, mi hoolake ma, taa mi tosko! Taa konne'en am njaalo yam.

³Hoolotooɓe ma fuu toskataako, ammaa tuurtuɓe dow ma, kamɓe toskoto.

⁴Anndinam laabi ma, yaa Jawmiraawo, ekkitinam ɗi.

⁵Ɗowam dow laawol gooŋga ma, ekkitinam, ngam an woni Allah Kisnoowo yam. Mi ɗon tammore nyalɗe fuu.

⁶Yaa Jawmiraawo, siftor enɗam ma e mbooɗeeŋga ma. Ɗum waŋgi diga ɓooyma.

⁷Taa siftor hakkeeji nderkaaku am e tuurtolji am. Ammaa siftoram fodde mbooɗeeŋga ma, ngam a booɗɗo, yaa Jawmiraawo.

⁸Jawmiraawo o booɗɗo, gooŋgaajo, o ɗon sappina hakke'en laawol booɗŋgol.

⁹O ɗon ɗowa yaŋkiniiɓe nder adilaaku, o ɗon anndina ɓe laawol maako.

¹⁰Laabi Jawmiraawo fuu ɗi booɗɗi e gooŋɗuɗi ngam ɗowtaniiɓe alkawal e seedamkuuji maako.

¹¹Yaa Jawmiraawo, ngam daliila innde ma, yaafanam aybeeji am, ngam ɗi ɗuuɗɗi.

¹²Woodi kulɗo Jawmiraawo na? Jawmiraawo sappinan mo laawol ngol o suɓata.

¹³Hayru laatanto mo foroy, ɓiɓɓe maako ndonan lesdi.

¹⁴Jawmiraawo ɗon anndina hulɓe ɗum sirriiji muuɗum, o faamtinan ɓe alkawal ngal o haɓɓi bee maɓɓe.

¹⁵Foroy gite am ɗon tiito Jawmiraawo, ngam kaŋko wurtinta kosɗe am diga tuuforgol.

¹⁶Waylita gal am! Hinnam! Ngam mi feere am, mi toskaaɗo.

¹⁷Ɓillaare am mawni masin, hisnam caɗeele am fuu!

¹⁸Laar jurumɗum am e torraaji am, yaafanam hakkeeji am fuu!

¹⁹Laar konne'en am, ɓe ɗuuɗɓe, ɓe ɗon nganyammi bee nganyŋgu caatuŋgu.

²⁰Aynu yoŋki am, hisnam! Taa mi tosko, ngam haa maaɗa nyukkiimi.

²¹Laaɓeeŋga e gooŋgaaku aynammi, ngam mi ɗon tammoro ma.

²²Yaa Allah, rimɗin Isra'iila'en, hisnu ɓe diga ɓillaaje maɓɓe fuu!