Read Fulfulde Jabuura 27 Bible Online

Jabuura 27 - Fulfulde bible

Jabuura 27

¹Yimre Daawuda. Jawmiraawo woni annoora am e kisndam am, moy kulanmi? Jawmiraawo woni hisrude yoŋki am, moy waawata hulnugo yam?

²To halluɓe ukkanake yam, ngiɗi nyaamugo yam, konne'en am e wanywanyɓe am, kamɓe pergoto, ndo'oto.

³To jama'aare konu saŋnginake yeeso am, mi hultortaa. Koo to konu ukkanake yam, ɓernde am ta'ataa sam.

⁴Huunde woore toriimi Jawmiraawo: Mi heɓa jooɗaago nder suudu maako balɗe am fuu, mi seyoro tedduŋgal maako belŋgal, mi yerdo haykaliiru maako.

⁵Ngam nyalaade sarru o suuɗatam nder suudu maako, o aynatam nder laymaaru maako, o darnatam dow tapaare.

⁶Jonta hoore am ɓaŋgake dow konne'en am taariiɓe yam, mi lii'anto mo kirseteeɗi nder laymaaru maako bee gime seyo, mi yiman, mi maŋgtan Jawmiraawo bee gime.

⁷Yaa Jawmiraawo, nan tornde am! Hinnam, jaabam!

⁸Mi ɗon siftora a umri: Ɗakkotire bee am. Ndaa mi ɗon ɗakkotira bee maaɗa, yaa Jawmiraawo[16].

⁹Taa wiirnam gite ma, taa riiw jaggiiɗo ma bee tikkere! Ngam an woni balloowo yam. Taa accam, taa wudinam yaa Allah, Kisnoowo yam!

¹⁰Koo to baaba am e daada am ngudini yam, Jawmiraawo kam jaɓɓatam.

¹¹Anndinam laawol ma, yaa Jawmiraawo, ɗowam dow laawol booɗŋgol, ngam daliila konne'en am.

¹²Taa hokkam haa juuɗe konne'en am. Ngam seedooɓe fewooɓe ɗon ndartano yam, ɗon mbaɗammi purka.

¹³Fakat mi yi'an mbooɗeeŋga Jawmiraawo dow lesdi yeeɗɓe.

¹⁴Tammora Jawmiraawo, laata cuusɗo! Tiɗɗin ɓernde ma! Tammora Jawmiraawo!