Read Fulfulde Jabuura 33 Bible Online

Jabuura 33 - Fulfulde bible

Jabuura 33

¹Onon adili'en, maŋgte Jawmiraawo bee gookaali seyo, ɗum pottuɗum gooŋga'en fuu ngimana mo gettooje.

²Maŋgte Jawmiraawo bee moolooru, ngimane mo bee hoodu marndu ɓoggi sappo.

³Ngimane mo yimre hesre, piye kuuje gimruɗe ɗe'e booɗɗum ngam maŋgtugo mo bee sawtu.

⁴Ngam wolde Jawmiraawo nde darnunde, kuuɗe maako fuu ɗe koolniiɗe.

⁵O yiɗi adilaaku e kiita ngooŋɗuka, mbooɗeeŋga Jawmiraawo heewi duniyaaru.

⁶Jawmiraawo tagri asamanji bee wolde mum, koode fuu bee poofɗe mum.

⁷O mooɓti ndiyamji mbeela fuu bana diŋiwol, o ɗon loowa ndiyamji lugguɗi nder cigorɗi.

⁸Sey duniyaaru fuu hula Jawmiraawo, yimɓe maaru fuu ndiwna yeeso maako!

⁹Ngam ko o wolwi fuu laati. Ko o umri fuu waɗi.

¹⁰Jawmiraawo ɗon wila nufayeeje ummaatooje, o ɗon nattina anniyaaji jama'aaje.

¹¹Ammaa nufayeeje Jawmiraawo ɗon tabiti haa foroy, anniyaaji maako duumoto haa gide fuu.

¹²Barka laatano ummaatoore nde Jawmiraawo woni Allah mum, jama'aare nde o suɓi haa o mara nde!

¹³Diga asama Jawmiraawo ɗon laara ɓiɓɓe Adaama fuu, o ɗon yi'a ɓe.

¹⁴Diga nokkuure nde o jooɗi, o ɗon laara yimɓe duniyaaru fuu.

¹⁵Kaŋko tagi ɓerɗe maɓɓe fuu, o ɗon hakkilana kuuɗe maɓɓe fuu.

¹⁶Walaa laamiiɗo mo hisata bee jama'aare konu ɗuuɗnde, walaa konoowo cuusɗo mo hisata bee ɗuuɗeeŋga semmbe mum.

¹⁷Hoolaago baawɗe pucci ngam heɓugo jaalorgal, ɗum huunde meere, no semmbe maaji ɗuuɗiri fuu, ɗi mbaawataa hisnugo.

¹⁸Ammaa Jawmiraawo ɗon ayna hulɓe ɗum, o ɗon ayna hoolotooɓe mbooɗeeŋga maako.

¹⁹O hisnan yoŋkiiji maɓɓe e maayde, o wuurnan ɓe nder wakkati weelo.

²⁰En ɗon tammoro Jawmiraawo, kaŋko woni balloowo meeɗen, o wawarde meeɗen.

²¹Ngam en ɗon ceyoro mo, en ɗon koolo innde maako seniinde.

²²Nde min ɗon kooli ma, yaa Jawmiraawo, mbooɗeeŋga ma wonda bee amin!