Read Fulfulde Jabuura 34 Bible Online

Jabuura 34 - Fulfulde bible

Jabuura 34

¹Daawuda waɗi hoore mum bana o ginnaaɗo yeeso Abimelek, Abimelek boo riiwi mo, o dilli. Ɓaawo maajum Daawuda yimi yimre nde'e:

²Mi yettan Jawmiraawo foroy, mi accataa maŋgtugo mo sam.

³Ɓernde am ɗon juroro Jawmiraawo, yaŋkiniiɓe fuu ɗon nana ɗum, ɗon ceyoro ɗum.

⁴Ngare, maŋgten Jawmiraawo, teddinen innde maako en fuu!

⁵Mi tori Jawmiraawo, o jaabi yam, o rimɗini yam diga ko hulnatammi fuu.

⁶Tijjotooɓe mo mbaŋginan welwelo muuɗum'en, ɓe cemtintaake.

⁷To laafuɗo wookani Jawmiraawo, o nanan, o hisnan mo ɓillaaje maako fuu.

⁸Malaa'ikaajo Jawmiraawo ɗon ayna hulɓe mo, o ɗon rimɗina ɓe.

⁹Maate, ngi'e no Jawmiraawo o booɗɗo! Barka laatanto nyukkotooɗo haa maako fuu.

¹⁰Kule Jawmiraawo, onon senaaɓe maako! Ngam hulɓe mo cooyataa koo ɗume.

¹¹Koo barooɗe boo ɗon maata sooynde e weelo, ammaa ɗakkotirɓe bee Jawmiraawo cooyataa hayru sam.

¹²Onon ɓikkoy am, ngare, naneeɗam, haa mi ekkitina on kulol Jawmiraawo:

¹³Moy yiɗi seyoraago ngeendam? Moy yiɗi juutal balɗe e hayru?

¹⁴Sey o acca wolwugo kalluka, o hakkilana ɗemŋgal maako, taa o wolwa bolle faasikiije.

¹⁵O daayo halleende, o waɗa mbooɗeeŋga, o tiino ɗaɓɓugo salaaman.

¹⁶Jawmiraawo ɗon ayna adili'en, noppi maako ɗon keɗito gookaali maɓɓe.

¹⁷Ammaa Jawmiraawo ɗon hona waɗooɓe zunuuba, haa o nattina ciftorki inɗe maɓɓe haa lesdi.

¹⁸To adili'en torake Jawmiraawo, o nanan, o wurtinan ɓe diga ɓillaaje maɓɓe fuu.

¹⁹Jawmiraawo o ɓadiiɗo ta'a-ɓerɗe'en, o hisnan ittuɓe tammunde fuu.

²⁰Adiliijo fottan bee boneeji ɗuuɗɗi, ammaa Jawmiraawo hisnan mo diga maaji fuu.

²¹Jawmiraawo aynan mo, ngam taa i'al maako koo gootal yewa.

²²Sarru mbaran kalluɗo, wanyɓe adiliijo ɓe hiiteteeɓe.

²³Jawmiraawo soottan yoŋkiiji jaggiiɓe muuɗum, nyukkotooɓe haa maako fuu kisan kiita.