Read Fulfulde Jabuura 35 Bible Online

Jabuura 35 - Fulfulde bible

Jabuura 35

¹Yimre Daawuda. Yaa Jawmiraawo, aybin aybinooɓe yam, haɓ bee haɓooɓe bee am!

²Naŋngu wawarde[17] ma famarde e mawnde! Umma, wallam!

³Los labbo e jaaral ma, fottu bee taasnooɓe yam! Wi'am: Min woni kisndam ma!

⁴Yiɗɓe mbarugo yam cemta! Nufaniiɓe yam sarru loro ɓaawo, tosko!

⁵Ɓe laato bana nyaande nde henndu ruuynata, malaa'ikaajo Jawmiraawo riiwa ɓe!

⁶Laawol maɓɓe nyiɓɓa, ngol moosta ɓe, malaa'ikaajo Jawmiraawo taasna ɓe!

⁷Ngam ɓe tuufani yam tuuforgol bilaa daliila, ɓe ngasi ngaska ngam halkugo yoŋki am bilaa daliila.

⁸Sey halkere ukkano ɓe bee juhuki! Tuuforgol ngol ɓe tuufni naŋnga ɓe! Ɓe ndo'o nder maagol, ɓe kalka!

⁹Ammaa min mi seyoto ngam daliila Jawmiraawo, mi welweltan daliila kisndam maako!

¹⁰Bee ɓernde am fuu mbi'anmi: “Yaa Jawmiraawo, walaa mo nanndi bee ma. A ɗon hisna toonyaaɗo diga juŋngo ɓurɗo ɗum semmbe, toskaaɗo e talakaajo boo diga juŋngo jaɓtoowo ɗum.”

¹¹Seedooɓe fewre ummake dow am, ɓe ɗon ƴamammi dow huunde nde mi anndaa.

¹²Ɓe ɗon mbarjo mbooɗeeŋga am bee halleende, mi lutti feere am.

¹³Saa'i ɓe nyawɓeno, mi ɓorni limce leppi buhuure, mi torri hoore am bee suumaago, mi tori bilaa accugo sam.

¹⁴Mi ɗonno waɗa bana to deerɗam malla soobaajo am maayi, mi ɗonno turi mi cuniiɗo bana cooyɗo daada mum.

¹⁵Ammaa nde mi do'i, ɓe ceyi, ɓe mooɓtotiri, ɓe mooɓotiri dow am! Yimɓe ɓe mi anndaa ɗon piyammi, ɗon ɓoccammi bilaa accugo.

¹⁶Hawtaade bee halluɓe ɓe ɗon njancammi masin, ɓe ɗon kirƴindira nyii'e dow am.

¹⁷Yaa Jawmiraawo, haa ndey munyanta ɗum? Hisnam diga ɓillaaje ɗe ɓe ukkantammi! Hisnu yoŋki am diga barooɗe ɗe'e!

¹⁸Min boo mi yettete nder mooɓtorde mawnde, mi maŋgtete nder jama'aare ɗuuɗnde.

¹⁹Taa accu konne'en am ceyoro do'ere am! Taa accu wanyɓe yam bilaa daliila kimƴindira gite dow am!

²⁰Ngam kamɓe ɓe mbolwataa haala salaaman, ammaa ɓe ɗon kasa pewe dow de'uɓe dow lesdi.

²¹Ɓe ɗon kaadanammi, ɓe ɗon mbi'a: “Yowwa! Min ngi'i ko mbaɗɗa!”

²²An, yaa Jawmiraawo, a yi'i ɗum, taa jeeɗa, taa daayu bee am!

²³Fin, yaa Jawmiraawo, gooŋɗinam! Umma, yaa Allah am, jiŋngam!

²⁴Gooŋɗinam fodde adilaaku ma, yaa Jawmiraawo! Yaa Allah am, taa accu ɓe ceyo daliila am!

²⁵Taa ɓe numa: “Yowwa, kanjum ngiɗen!” Taa ɓe mbi'a: “En moɗi mo!”

²⁶Seyortooɓe bone am fuu, sey ɓe cemta, ɓe tosko! Mawnitittooɓe dow am, ɓe cemta, ɓe tosko!

²⁷Ammaa seyortooɓe adilaaku am, hokku ɓe seyo e welwelo, haa ɓe mbi'a tum: “Jawmiraawo o mawɗo, o ɗon seyoro hayru jaggiiɗo maako!”

²⁸Min kam mi wolwan haala adilaaku ma e mi maŋgtete nyalɗe fuu!