Read Fulfulde Jabuura 40 Bible Online

Jabuura 40 - Fulfulde bible

Jabuura 40

¹Ngam kaliifaajo gime. Yimre Daawuda.

²Dow Jawmiraawo tabitinmi tammunde am. Nden o wayliti heedi am, o nani wookaandu am.

³O wurtini yam ngaska halkere e ngaska loope lugguɗe, o jo'ini kosɗe am dow tapaare, o semmbiɗini palanɗe am.

⁴O waɗi yimre hesre nder hunnduko am, ngam mi yimana Allah men maŋgtoore. Ɗuuɗɓe ngi'an ɗum, kultoran ɓaawoɗon ɓe kooloto Jawmiraawo.

⁵Barka laatanto kooliiɗo Jawmiraawo, mo ɗakkotirtaa bee mawnitiiɓe e hasooɓe pewe!

⁶Yaa Jawmiraawo Allah am, a ɗuɗɗinani min kaayeefiiji ma e nufayeeje ma booɗɗe! Walaa nannduɗo bee ma. Mi yiɗi yeccugo ɗum e wooynugo ɗum, ammaa mi waawataa yeccugo ɗum fuu, ngam ɗi ɗuuɗɗi masin.

⁷A seyoraaki kirseteeɗi e dokke nyaamdu, a ɗaɓɓaay guleteeɗi e kirseteeɗi ngam ittuki hakke. Ammaa a maɓɓitani yam noppi ngam haa mi nane.

⁸Nden mbi'mi: “Ndaa yam, mi wari. Haala dow am winndaama nder deftere taggaande.

⁹Mi ɗon seyoro waɗugo muuyo ma, yaa Allah am, tawreeta ma ɗon nder lugguɗum ɓernde am.”

¹⁰Mi wooynan adilaaku ma nder mooɓtorde mawnde, yaa Jawmiraawo, an, a anndi mi accataa wooynugo ɗum.

¹¹Mi suuɗaay haala adilaaku ma nder ɓernde am, mi wolwi dow hoolaare ma e kisndam ma. Nder mooɓtorde mawnde, mi jeeɗaaki, mi suuɗaay mbooɗeeŋga ma e gooŋgaaku ma.

¹²Yaa Jawmiraawo, mi anndi a salataa hinnaago yam, mbooɗeeŋga ma e gooŋgaaku ma ɗon aynammi koo ndey.

¹³Torraaji ɗuuɗɗi taarake yam, ɗi limataake. Aybeeji am taasni yam, njokkake yam, ɗon kaɗammi yi'ugo. Ɗi ɓuri gaasaaji hoore am ɗuuɗugo, mi itti tammunde am fuu.

¹⁴Useni, hisnam, yaa Jawmiraawo, yaawɗa, yiidam!

¹⁵Yiɗɓe mbarugo yam, ɓe fuu ɓe cemta! Seyortooɓe sarru am, lornu ɓe ɓaawo, toskin ɓe!

¹⁶Jalanɓe yam, sey ɓe kultora daliila toskaare maɓɓe!

¹⁷Ammaa ɗakkotirɓe bee ma fuu, yaa Jawmiraawo, hokku ɓe seyo e welwelo! Yiɗɓe kisndam maaɗa mbi'a foroy: “Jawmiraawo woni mawɗo!”

¹⁸Min maa mi laafuɗo, mi talakaajo, ammaa an, yaa Jawmiraawo, a ɗon hakkilana yam. An woni balloowo yam, kisnoowo yam, war law, yaa Allah am!