Read Fulfulde Jabuura 41 Bible Online

Jabuura 41 - Fulfulde bible

Jabuura 41

¹Ngam kaliifaajo gime. Yimre Daawuda.

²Barka laatanto kakkilananɗo laafuɗo, Jawmiraawo hisnan mo nder nyalaade sarru.

³Jawmiraawo aynan mo, wuurnan mo, barkiɗinan mo nder lesdi maako. Jawmiraawo hokkataa mo haa juuɗe konne'en maako.

⁴To o nyawi, o waalake dow be'itte maako, Jawmiraawo wallan mo, yamɗitinan mo.

⁵Min mi wi'i: “Yaa Jawmiraawo, hinnam! Nyawndam, ngam mi waɗi hakke dow maaɗa!”

⁶Konne'en am ɗon kallinammi, ɗon mbi'a: “Ndey o maayata haa innde maako yejjite?”

⁷Waranɓe laarugo yam fuu ɓe naafiki'en. Ɓe mooɓtan haalaaji kalluɗi, nden ɓe ngurto yaasi, ɓe mbolwana yimɓe.

⁸Wanyɓe yam fuu ɗon cofndotira, ɗon nyo'ammi, ɗon nufano yam sarru.

⁹Ɓe ɗon mbi'a: “Naaloore heɓi mo! Ndaa o ɗon waali, o ummitittaako!”

¹⁰Koo soobaajo am mo kooliimi, mo nyaami nyaamdu am boo, ummani yam.

¹¹Ammaa an, yaa Jawmiraawo, hinnam! Umminam ngam haa mi waato!

¹²To a accaay konne'en njaali yam, nden kam mi anndan a yerdake yam.

¹³A tabitini yam ngam mi timmuɗo, foroy a aynatam yeeso ma.

¹⁴Yettoore laatano Jawmiraawo, Allah Isra'iila, haa abada abadin! Aamiina! Aamiina!