Read Fulfulde Jabuura 42 Bible Online

Jabuura 42 - Fulfulde bible

Jabuura 42

¹Ngam kaliifaajo gime. Yimre ekkitinoore nde ɓiɓɓe Koora.

²Bana lelwa ɗomɗuŋga yenwirta ndiyam haa maaje, non yoŋki am yenwirte, yaa Allah!

³Yoŋki am ɗon yenwa Allah geeto masin. Ndey keɓanmi wargo daro yeeso maaɗa, yaa Allah?

⁴Gonɗi am laati nyaamdu am jemma e naaŋge fuu, ngam foroy ɓe ɗon ƴamammi: “Toy Allah ma woni kadi?”

⁵Naane mi yahdi bee yimɓe haa haykaliiru Allah, mi ardi mooɓre maɓɓe mawnde, min mbaɗi juulde bee hoolo seyo e gime maŋgtooje. To mi siftori ɗum, ɓernde am naawan masin!

⁶Ko nafata to mi sunake, to mi uumi bana non? Ndikka mi tammoro Jawmiraawo. Ngam mi anndi mi yettan mo fahin, ngam kaŋko woni kisnoowo yam!

⁷Yaa Allah am, ɓernde am suni, ngam man mi siftori ma, diga mi ɗonno jooɗi haa lesdi Urdun, gal kooseeje Hermoon e Mica'ar.

⁸Ndiyamji lugguɗi ɗon koolda bana jurde ndiyam, ƴuuge ma e ilamji ma fuu ɗon caalo dow am.

⁹Nyalawma fuu, Jawmiraawo waŋginanammi mbooɗeeŋga mum, jemma fuu mi yimanan mo maŋgtooje, mi toro Allah mo ɗon yeeɗinammi.

¹⁰Mi ɗon ƴama Allah, tapaare suuɗirde am: “Koni a yejjiti yam? Ngam ɗume cuniimi? Ngam ɗume konne'en toonyatammi?”

¹¹Konne'en am ɗon kuɗammi. Foroy ɓe ɗon ƴamammi: “Toy Allah ma woni kadi?” Bana to ɓe ɗon ngewammi i'e.

¹²Ko nafata to mi sunake, to mi uumi bana non? Ndikka mi tammoro Jawmiraawo. Ngam mi anndi mi yettan mo fahin, ngam kaŋko woni kisnoowo yam e Allah am!