Read Fulfulde Jabuura 44 Bible Online

Jabuura 44 - Fulfulde bible

Jabuura 44

¹Ngam kaliifaajo gime. Yimre ekkitinoore nde ɓiɓɓe Koora.

²Yaa Allah, bee noppi amin min nani haala kuuɗe mawɗe ɗe kuuwɗa wakkati ɓooyma. Kaakiraaɓe amin limtani min ɗum ko mbaɗɗa nder zamanu maɓɓe.

³An bee hoore ma a riiwi ummaatooje, a tabitini yimɓe ma nder lesdi maɓɓe. A torri ummaatooje man, ngam haa ummaatoore ma feeco.

⁴Ngam ɓe nyaamaay lesdi bee kaafaaje maɓɓe, ɓe njaalaaki ngam daliila baawɗe maɓɓe boo. Baawɗe ma mawɗe e gondal ma e mbooɗeeŋga ma mbaɗi ɗum, ngam a yerdi ɓe.

⁵Yaa Allah, an woni laamiiɗo am, an hokki danygol Yaakubu jaalorgal.

⁶Bee ballal maaɗa min ndo'ata konne'en amin, bee baawɗe innde ma min ndamman wanywanyɓe amin.

⁷Ngam naa lagaawal am kooliimi, kaafahi am hisnataa yam.

⁸Ammaa an hisnata min juuɗe konne'en amin, a semtini wanyɓe min.

⁹Min ceyorto ma nyalaaɗe fuu, yaa Allah, min maŋgtan innde ma foroy.

¹⁰Ammaa jonta a wudini min, a toskini min, a acci wondugo bee jama'aare konu amin.

¹¹A doggini min yeeso konne'en amin, wanyɓe min njaɓti jawdi amin.

¹²A laatini min bana baali kirseteeɗi ngam nyaameego, a saŋkiti min nder lesɗe ummaatooje goɗɗe.

¹³A soorri ummaatoore ma buutu, a riskaay bee coggu man.

¹⁴A acci heeddiɗɗiraaɓe amin ɗon kuɗa min, ɓe ɗon njala min, ɓe ɗon njanca min.

¹⁵A laatini min daliila jancoore yeeso ummaatooje goɗɗe, yimɓe maaje ɗon njala min, ɗon ndimmbina ko'e muuɗum'en dow amin.

¹⁶Mi ɗon yi'a toskaare am foroy, mi heewi mbustu,

¹⁷ngam jaleeɗe konne'en am e bolle mettuɗe ɗe waatooɓe yam mbolwata.

¹⁸Ɗum fuu ɗum warani min, koo nde min ngejjitaay ma boo, min mbaɗaay aybe dow alkawal maaɗa bee amin.

¹⁹Min accaay tokkaago ma, min celaay laawol ma.

²⁰Ammaa an a dammi min haa nokkuure cuuli ngoni, a nastini min nyiɓre nyiɓɓunde.

²¹To min ngejjitino innde Allah amin, to min torino ɗowanteeɗo jananno,

²²Allah heɓtataano ɗum naa, kaŋko annduɗo numooji amin cuuɗiiɗi?

²³Ammaa ngam daliila maaɗa ɓe ɗon mbara min nyalɗe fuu, ɓe ɗon ndaara min bana baali kirseteeɗi.

²⁴Fin, yaa Jawmiraawo! Ngam ɗume ɗaanotoɗa? Umma, taa wudin min haa foroy!

²⁵Ngam ɗume mbirnuɗa gite ma? Ngam ɗume ngejjititɗa bone e ɓillaare amin?

²⁶Ngam min njani nder mbulwuldi, ɓalli amin ɗon kippi dow lesdi!

²⁷Umma, war wallu min! Hisnu min ngam daliila mbooɗeeŋga ma!