Read Fulfulde Jabuura 46 Bible Online

Jabuura 46 - Fulfulde bible

Jabuura 46

¹Ngam kaliifaajo gime. Yimre ɓiɓɓe Koora fodde daande “alamot”[20].

²Allah woni hisrude men e semmbe men! Koo ndey ɓillaare heɓi en, o wallan en.

³Ngam man en kultortaa koo to lesdi dimmbake, koo to kooseeje ngibbi nder beeli,

⁴koo to ndiyamji kooli, ƴuufi, mbaɗi boo ƴuuge towɗe haa kooseeje ndimmbi.

⁵Ndaa maayo, cele maago ɗon ceyna berniwol Allah, jooɗorde Ɓaŋiiɗo seniinde.

⁶Allah ɗon nder maagol, ngol dimmbataako, diga baɓɓol Allah ɗon walla ngol.

⁷Ummaatooje mbaɗi tuurtol, laamuuji ndimmbi. To Allah telɓi, duniyaaru ɓolwan.

⁸Jawmiraawo honooɓe asama ɗon wondi bee meeɗen, Allah mo Yaakubu laatani en hisrude townde.

⁹Ngare, ndaare kuuɗe Jawmiraawo! O huuwi kuuɗe nattinooje kulniiɗe haa duniyaaru.

¹⁰Kaŋko timminta konuuji haa keeri duniyaaru fuu, o ɗon yewa lagaaje e labbe, o ɗon wula mootaaji pucci honooɓe.

¹¹O ɗon wi'a: “Nde'ite, annde min woni Allah. Min woni Ɓaŋiiɗo dow ummaatooje duniyaaru fuu.”

¹²Jawmiraawo honooɓe asama ɗon wondi bee meeɗen, Allah mo Yaakubu laatani en hisrude townde.