Read Fulfulde Jabuura 50 Bible Online

Jabuura 50 - Fulfulde bible

Jabuura 50

¹Yimre Asaf. Jawmiraawo, Allah Mawɗo wolwi. O ewni duniyaaru fuu diga fuɗirde naaŋge haa mutirde maage.

²Jayŋgol Allah ɗon yayna diga Siyona, berniwol ŋarniiŋgol, timmuŋgol.

³Allah meeɗen ɗon wara, o jeeɗataako! Yiite nyaamooye ɗon ardi mo, henndu saatundu ɗon taari mo.

⁴O ɗon ewno asamanji e lesdi, haa o hiito ummaatoore maako.

⁵O wi'i: “Mooɓtaneeɗam hoolaaɓe am, haɓɓuɓe alkawal bee am bee lii'anaago yam kirseteeɗi.”

⁶Asamanji ɗon ngooyna adilaaku maako, ngam Allah woni kiitoowo.

⁷“Nan, an ummaatoore am! Haa mi wolwane. An Isra'iila, mi seedoto aybe ma. Min woni Allah, mi Allah maaɗa.

⁸Mi felataa ma ngam kirseteeɗi maaɗa e guleteeɗi ma ɗi lii'antoɗa yam tum.

⁹Mi hoo'ataa ngari ma kalhaldi diga saare ma malla jawɗi be'i haa waalde ma.

¹⁰Ngam min mari dabbaaji laynde fuu, non boo dabbaaji dow kooseeje ujineeje.

¹¹Mi anndi colli kooseeje fuu, kuuje ladde fuu min jeyi.

¹²Koo to mi maatino dolo, mi wi'ataano on, ngam duniyaaru e bee ko hebbini ndu fuu, min jeyi.

¹³Kadi mi nyaaman kusel ga'i na? Malla mi yaran ƴiiƴam jawɗi?

¹⁴Lii'ana Allah ma yettoore, hebbin togayeeje ma heedi Ɓaŋiiɗo!

¹⁵Toram nder wakkati ɓillaare, nden kam mi hisnete, an boo a maŋgtatam.”

¹⁶Ammaa kalluɗo, Allah wi'i ɗum: “Koni limtata umrooje am, koni mbolwata haala alkawal am?

¹⁷An caliiɗo elto am, a wudini bolle am ɓaawo ma!

¹⁸To a yi'i gujjo, a hawtan bee maako, a ɗon hawtana jeenooɓe.

¹⁹Hunnduko ma ɗon ɓula bolle kalluɗe, ɗemŋgal ma ɗon haso naafikaare.

²⁰A ɗon jooɗo nyo'a deerɗiraawo ma a ɗon hallina ɓii daada ma.

²¹Kanjum kuuwɗa — min mi jeeɗi. Ngam man a tammi, min boo bana maaɗa mbaami. Ammaa jonta mi felete haa mi waŋginane aybe ma!

²²Paame ɗum, onon yejjitanɓe yam! To naa non mi seekan on, kisnanɗo on boo walaa.

²³Lii'antooɗo yam yettoore, teddintam, darnanɗo laawol mum, mi yi'nan ɗum kisndam am”.