Read Fulfulde Jabuura 66 Bible Online

Jabuura 66 - Fulfulde bible

Jabuura 66

¹Ngam kaliifaajo gime. Yimre. Ngimane Allah bee welwelo, onon yimɓe lesdi fuu.

²Ngime ngam tedduŋgal innde maako, teddine mo bee gime maŋgtooje.

³Mbi'e Allah: “Kuuɗe ma ɗe kaayeefiije! Koo konne'en ma boo tefi fottango ma bee bolle belɗe, ngam baawɗe ma ɗuuɗi masin.

⁴Sey duniyaaru fuu sujidane, yimane gettooje, maŋgta innde ma!”

⁵Ngare, ndaare kuuɗe Allah, kuuɗe maako kulniiɗe ɗe o huuwani ɓiɓɓe Aadama!

⁶O wartiri mbeela lesdi njoorndi, ɓe ta'i maayo bee kosɗe. Kanjum waɗi en ceyori mo!

⁷Bee baawɗe maako o ɗon laamo haa foroy, gite maako ɗon ayna ummaatooje, ngam taa tuurtooɓe keɓa ummanaago mo.

⁸Maŋgte Allah amin, onon ummaatooje! Ngimane mo maŋgtoore bee sawtu!

⁹O ɗon ayna yoŋkiiji amin, o accaay min min ndo'o.

¹⁰Ngam yaa Allah, a linyi min, a laɓɓini min bana goɗɗo laɓɓinirta cardi nder yiite.

¹¹A nastini min nder tuuforgol, a yowani min doŋngal tedduŋgal.

¹²A acci konne'en amin njaaɓa min ko'e bee pucci, a saalini min yiite e ndiyam lugguɗam, ammaa jonta a wurtini min, a feecini min.

¹³Mi wardan bee guleteeɗi haa suudu ma, ngam mi hebbinane togayeeje am.

¹⁴Mi hokkete ko mi togani ma saa'i mi ɗonno nder ɓillaare.

¹⁵Mi lii'anto ma guleteeɗi payɗi, hawtaade bee uureeŋga jawɗi baali guleteeɗi, mi lii'anto ma ga'i e jawɗi be'i boo.

¹⁶Onon hulɓe Jawmiraawo fuu, ngare, nane! Haa mi anndina on ko o waɗani yam.

¹⁷Mi wookani mo ngam ballal, mi maŋgti mo.

¹⁸To mi nufakeno halleende, Jawmiraawo nanantaano yam.

¹⁹Ammaa Allah nani yam fakat, o heɗiti tornde am.

²⁰Yettoore laatano Allah, ngam o salaaki do'a am, o ittanaay yam mbooɗeeŋga maako.