Read Fulfulde Jabuura 73 Bible Online

Jabuura 73 - Fulfulde bible

Jabuura 73

¹Yimre Asaf. Fakat, Allah ɗon woonana Isra'iila, laaɓa-ɓerɗe'en fuu ɗon maata mbooɗeeŋga maako.

²Ammaa min kam mi ɓadake fergaago, lutti seɗɗa, kosɗe am moosto.

³Ngam mi haaji mawnitiiɓe, saa'i mi yi'i hayru halluɓe.

⁴Kamɓe ɓe njarataa bone haa timmoode balɗe maɓɓe, ɓe yamɓe, deeɗi maɓɓe tekki.

⁵Ɓe torrataako bana yimɓe woɗɓe, ɓe ngalaa caɗeele bana yimɓe woɗɓe.

⁶Ngam maajum ɓe ɗon mawnito yeeso yimɓe, ɓe ɓorni toonyaare boo bana ngapaleewol.

⁷Ɓerɗe maɓɓe ɗon ɓula halleende, numooji maɓɓe fuu ɗum tuurtolji.

⁸Ɓe ɗon njanca yimɓe, ɓe ɗon mbolwa bolle kalluɗe ngam ɓillugo yimɓe, ɓe ɗon mbolwa bee mawnitaare.

⁹Ɓe ɗon kallina asamanji, haa duniyaaru boo ɓe ɗon mbolwa ko ɓe ngiɗi fuu.

¹⁰Ngam maajum yimɓe fuu ɗon ngaylito haa maɓɓe, ɗon njara ɗuuɗal bolle maɓɓe bana yarugo ndiyam.

¹¹Halluɓe ɗon mbi'a: “Allah anndataa ɗum, Ɓaŋiiɗo walaa anndal sam.”

¹²Bana non halluɓe ɓe'e mba'i, ɓe keɓi hayru foroy, jawdi maɓɓe ɗon ɓesdo.

¹³Meere aynumi hoore am nder senaare! Meere boo aynumi juuɗe am ngam taa ɗe mbaɗa zunuuba!

¹⁴A torratam nyalaade fuu, nde weeti fuu a ɓoccatam.

¹⁵To mi numno wolwugo bana halluɓe ɓe'e, nden kam mi zammbotono yimɓe ma.

¹⁶Ngam maajum mi haɓdi faamugo ɗum, ammaa ɗum salori yam,

¹⁷haa mi nasti haykaliiru Allah, nden mi faami timmoode maɓɓe.

¹⁸Fakat a jo'inan ɓe dow nokkuuje moostanɗe, a do'an ɓe nder halkere.

¹⁹Ɓe kalkan law, ɓe majjan, timmoode maɓɓe laatoto hulniinde.

²⁰Yaa Jawmiraawo, ɓe nanndi bee koyɗol dillanŋgol fajiri, to a fini, a faalataa ɓe.

²¹Saa'i ɓernde am laski, ngam haala man naawi yam masin,

²²saa'i man mi paataaɗo, mi walaa faamu, laatiimi bana ndabbaawa yeeso ma.

²³Ammaa bee non fuu mi ɗon wondi bee maaɗa haa foroy, a ɗon jogi juŋngo am.

²⁴A ɗon ɗowammi fodde muuyo ma, ɓaawo man a jaɓɓorto yam bee tedduŋgal.

²⁵Moy laatani yam nder asama, sonaa an? Nde nii mi ɗon wondi bee maaɗa, walaa ko seynatammi haa duniyaaru.

²⁶Koo to ɓanndu am jinni bee ɓernde fuu, Allah woni tapaare am semmbiɗnde e geɗal am haa foroy.

²⁷Fakat, daayotooɓe ma kalkan, a nattinan yewɓe alkawal ma fuu.

²⁸Ammaa min kam, ɓaditaago Allah wooɗani yam, mi hooli Allah Jawmiraawo, kaŋko woni hisrude am. Mi anndinan yimɓe kuuɗe ma fuu.