Read Fulfulde Jabuura 90 Bible Online

Jabuura 90 - Fulfulde bible

Jabuura 90

¹Do'aare Muusa, goɗɗo Allah. Yaa Jawmiraawo, an woni hisrude amin diga yidere haa yidere.

²Diga kooseeje ciwaa waŋgugo, diga duniyaaru boo tagaaka, an woni Allah duumiiɗo foroy haa abada.

³A lortinan ɓiɓɓe Aadama nder mbulwuldi bee wi'ugo: Lorte haa iwɗon.

⁴Duuɓi ujineere laatani ma bana nyalaade keenyaare, saaliinde, bana saa'a ngoota nder jemma.

⁵A wiftoto yimɓe. Ngeendam maɓɓe bana koyɗol, fajiri ngol jinni. Ɓe nanndi bee pinndi ladde,

⁶fajiri ndi finnan, kiikiiɗe boo ndi ɗaylan, ndi yooran.

⁷Daliila ɓernuki ma, min ɗon natta, Daliila caatal ɓernuki ma, min ɗon kula.

⁸A ɗon darna aybeeji amin yeeso ma, a ɗon waŋgina boofi amin cuuɗiiɗi nder jayŋgol ma.

⁹Nyalaade fuu min ɗon ngeeɗa les ɓernuki ma, duuɓi amin caaloto bana foofannde woore.

¹⁰Ngeendam amin waɗan duuɓi cappanɗe joweeɗiɗi, ngam semmbiɗɓe boo, cappanɗe joweetati. Ɗum fuu ɗum sarru e torra tan. Ɗum saaloto law, maayde ɗon yaawna min.

¹¹Moy anndi semmbe ɓernuki ma? Moy anndi tikkere ma fodde kulol ngol haandani ma?

¹²Ekkitin min limugo balɗe amin, haa min keɓa hikma.

¹³Lora Yaa Jawmiraawo, accu ɓernango min. Enɗu maccuɓe ma!

¹⁴Nde weeti fuu hebbin min mbooɗeeŋga ma, haa min ngima bee welwelo balɗe amin fuu!

¹⁵Seynu min deydey no a toskiri min, fodde duuɓi ɗuuɗɗi ɗi min njari bone!

¹⁶Waŋginan maccuɓe ma kuuɗe ma, hollu ɓikkoy amin tedduŋgal ma!

¹⁷Yaa Allah Jawmiraawo amin, tedduŋgal ma belŋgal wonda bee amin! Semmbiɗin kuuɗe juuɗe amin, tabitin ɗe!