Read Fulfulde Balndi 10 Bible Online

Balndi 10 - Fulfulde bible

Balndi 10

¹Ndaa balndi Suleymaanu goɗɗi: Ɓiɗɗo kakkilɗo seynan baaba mum, ammaa ɓiɗɗo paataaɗo mettinan ɓernde daada mum.

²Ndesaaje keɓraaɗe bee halleende nafataa, ammaa adilaaku hisnan diga maayde.

³Jawmiraawo accataa adiliijo bee weelo, ammaa o hokkataa halluɓe fodde suuno muuɗum'en.

⁴Mbaateendam laafinan, ammaa tiinaare riskinan.

⁵Mooɓtanɗo ƴaamle ɓaawo nduŋngu, kaŋko woni kakkilɗo. Ɗaanotooɗo saa'i codol, kaŋko woni cemtiniiɗo.

⁶Barkaaji ɗon dow hoore adiliijo, ammaa toonyaaŋge ɗon sudda hunnduko kalluɗo.

⁷Yimɓe ciftoran adiliijo, mbarkiɗinan mo, ammaa ɓe ngejjitan innde kalluɗo law.

⁸Marɗo hakkiilo jaɓan umrooje, ammaa bolwanɗo bolle paataaɗe do'oto.

⁹Jahanɗo bee gooŋgaaku yahan jam, ammaa lelanɗo laabi mum, aybe mum waŋgan.

¹⁰Kimƴanɗo bee gite mettinan ɓerɗe, bolwanɗo bolle paataaɗe do'oto.

¹¹Hunnduko adiliijo woni seeɓoore ngeendam, ammaa toonyaaŋge ɗon sudda hunnduko kalluɗo.

¹²Nganyŋgu umminan jokkirli, ammaa yiide suddan aybeeji fuu.

¹³Hikma ɗon haa hunnduko kakkilɗo, ammaa ɓaawo sooya-hakkiiloojo sawru tan fottata.

¹⁴Hikma'en cigoto anndal, njeeɗoto, ammaa hunnduko paataaɗo ɓadinan sarru.

¹⁵Jawdi diskuɗo woni mahol maako cemmbiɗŋgol, laafere talaka'en woni sarru maɓɓe.

¹⁶Maral adiliijo yahran mo haa ngeendam, ngeenaari kalluɗo nastinan mo hakke.

¹⁷Kakkilananɗo elto ɗon yaha dow laawol ngeendam, ammaa calotooɗo feloore majjan.

¹⁸Cuuɗanɗo nganyŋgu mum woni naafikiijo, baŋginanɗo waadoore woni paataaɗo.

¹⁹To bolle ɗuuɗi, aybeeji tampataa, ammaa naŋgtuɗo hunnduko mum mari hakkiilo.

²⁰Bolle adiliijo nanndi bee cardi mboondi, ammaa numooji kalluɗo ngalaa saman ɗuuɗɗo.

²¹Bolle adiliijo nguurnan ɗuuɗɓe, ammaa faataaɓe maayan ngam sooynde hakkiilo.

²²Barka Jawmiraawo, kaŋka riskinta, comri neɗɗo ɓesdataa koo ɗume.

²³Paataaɗo seyorto kuugal kalluŋgal, ammaa kakkilɗo seyorto hikma.

²⁴Ko kalluɗo huli, kanjum waranta mo. Ko adiliijo yiɗi, o heɓan ɗum.

²⁵To masiibo saalake, kalluɗo natti, ammaa adiliijo ɗon tabiti haa foroy.

²⁶Bana lammuɗam haa nyii'e malla cuurɗe haa gite, non mbaateendamjo wa'i haa nelɗo mo.

²⁷Kulol Jawmiraawo juttinan balɗe, ammaa balɗe halluɓe ndamman.

²⁸Tammunde adili'en laatoto seyo, ammaa yela halluɓe laatoto meere.

²⁹Jawmiraawo woni hisrude laaɓɗo, ammaa o halkere waɗooɓe zunuuba.

³⁰Haa foroy adiliijo dimmbataako, ammaa kalluɗo tabitittaa haa lesdi.

³¹Hunnduko adiliijo wolwan hikma, ammaa ɗemŋgal faasikiiwal ta'ete.

³²Hunnduko adiliijo anndi bolle ceynooje, ammaa hunnduko kalluɗo faasikaare tan anndi.