Read Fulfulde Balndi 13 Bible Online

Balndi 13 - Fulfulde bible

Balndi 13

¹Ɓiɗɗo kakkilɗo jaɓan elto baaba mum, ammaa nanaro nanataa feloore.

²Booɗɗo haaran bee nafuuda bolle mum booɗɗe, ammaa zammbooɓe ɗaɓɓan toonyaaŋge.

³Aynanɗo hunnduko mum aynan yoŋki mum, ɗuuɗa-haalaajo halkan.

⁴Mbaateendamjo ɗaɓɓan, o heɓataa, ammaa tiiniiɓe keɓan ko ɓe ngiɗi.

⁵Gooŋgaajo ɗon wanya fewre, ammaa kalluɗo waɗan cemtiniiɗum e toskiiɗum.

⁶Adilaaku aynan laaɓɗo, ammaa halleende halkan marɗo hakke.

⁷Oo ɗon riskitino, o walaa koo ɗume, oya ɗon laafitino, o mari ɗuuɗɗum.

⁸Diskuɗo soottan yoŋki mum bee jawdi mum, ammaa fasooɓe kulnataa talakaajo.

⁹Adiliijo nanndi bee jayŋgol laaɓŋgol, kalluɗo nanndi bee pittirlayel nyifanŋgel.

¹⁰Mawnitaare umminan jokkirgol tan, ammaa hikma wondan bee jaɓanɓe sawari.

¹¹Jawdi mooɓtaandi bee jaawal jinnan jaawɗum, mooɓteteendi seɗɗa seɗɗa ɓesdoto.

¹²Juttingo tammunde nyawnan ɓernde, ammaa heɓugo yela mum woni lekki ngeendam.

¹³Mo yawi sawari, waɗan asar, mo yerdi umroore, heɓan mbarjaari mboondi.

¹⁴Anndinol hikmaajo woni seeɓoore ngeendam, ngol wallete daɗugo tuuforli maayde.

¹⁵Hakkiilo wooɗŋgo heɓnan yerduye, ammaa faasiki'en ɗon tokko laawol halkere.

¹⁶Kakkilɗo waɗan kuuje fuu bee anndal, ammaa paataaɗo we'itan faataare mum.

¹⁷Nelaaɗo kalluɗo ɓadinan sarru, ammaa nelaaɗo gooŋgaajo waddan jam.

¹⁸Laafere e mbustu laatanto koo moy sali elto, ammaa kakkilananɗo feloore heɓan tedduŋgal.

¹⁹Heɓugo yela welanan ɓernde, ammaa faataaɓe ngiɗaa daayaago halleende.

²⁰To a yahdi bee hikma'en, a heɓan hikma, to a soobri bee faataaɓe, a yi'an bone.

²¹Sarru ɗon taasna marɓe hakke, ammaa hayru woni ngeenaari adili'en.

²²Booɗɗo heɓnan taaniraaɓe mum ndonŋgu, ammaa jawdi baɗɗo hakke laatanto adiliijo.

²³Ngesa ka laafuɗo remi ɗum, fuɗnan nyaamdu ɗuuɗndu, ammaa halkere ukkanto cooyɗo gooŋga.[5]

²⁴Mo ɓoccataa ɓiyum, yiɗaa ɗum, giɗɗo ɗum fuɗɗan eltugo ɗum law.

²⁵Adiliijo nyaaman, haaran, ammaa deeɗi halluɓe maatan weelo.