Read Fulfulde Balndi 14 Bible Online

Balndi 14 - Fulfulde bible

Balndi 14

¹Debbo marɗo hikma nyiɓan saare, ammaa debbo paataaɗo yibbinan nde.

²Tokkiiɗo laawol darnuŋgol woni kulɗo Jawmiraawo, ammaa tokkiiɗo laabi leliiɗi ɗon yawo Allah.

³Bolle paataaɗo, mawnitiiɗo pooɗanan mo ɓoccol, ammaa bolle hikma'en aynan ɓe.

⁴To ga'i demooji ngoodaa, beembal sookɗan, ammaa ga'i ɗuuɗɗinan ƴaamle.

⁵Ceedoowo gooŋgaajo fewataa, ammaa ceedoowo pewoowo, sey pewe.

⁶Jancoowo ɗaɓɓitan hikma, heɓataa, ammaa kakkilɗo, anndal hoyani ɗum.

⁷Daaya laawol paataaɗo, ngam a heɓataa anndal nder bolle maako.

⁸Kakkilɗo anndi laawol mum ngam o woodi hikma. Ammaa faataare paataaɗo ɗum rikici.

⁹Faataaɓe ɗon calo ƴamgo yaafuye dow aybeeji muuɗum'en ammaa gooŋga'en ɗon narra caka muuɗum'en.

¹⁰Sey ɓernde neɗɗo tan anndi metteeŋga mum, walaa jananno nastata seyo maare boo.

¹¹Cuuɗi halluɓe ngibban, ammaa cuuɗi gooŋga'en mbaɗan barka.

¹²Goɗɗo ɗon laara laawol mum bana ngol darnuŋgol, asee boo ngol ɗon yahra mo haa maayde.

¹³Koo bee jaleeɗe boo ɓernde mettan, timmoode seyo woni suno.

¹⁴Halla-haaliijo saftan ngeenaari hakkeeji mum, booɗɗo haaran mbarjaari kuuɗe mum.

¹⁵Sooya-anndaljo nuɗɗinan bolle fuu, ammaa kakkilɗo hakkilanan palanɗe mum.

¹⁶Hikmaajo hulan halleende, daayoto nde, ammaa paataaɗo hakkiltaa, yahan yeeso.

¹⁷Ɓernanɗo law waɗan bana paataaɗo, yimɓe nganyan baɗoowo dabareeji kalluɗi.

¹⁸Sooya-anndal'en ndonan faataare, ammaa hakkilɓe njaagnorto bee anndal.

¹⁹Halluɓe turoto yeeso wooɗɓe, waɗooɓe halleende boo haa dammuɗe adili'en.

²⁰Talakaajo, koo keeddiɗɗiiko wanyan mo, ammaa yiɗɓe diskuɗo ɗuuɗan.

²¹Mo yawi keeddiɗɗum, waɗi hakke, mo enɗi laafuɗo, barka laatanto ɗum.

²²Mo nufani woɗɓe sarru, majjan fakat, ammaa mo nufani ɓe hayru, heɓan mbooɗeeŋga e gooŋgaaku.

²³Kuugal ngale fuu woodi nafuuda, ammaa haala meere waddan sooynde.

²⁴Daraja hikma'en, ɗum risku maɓɓe, ammaa faataaɓe heɓtirteeɓe bee faataare muuɗum'en.

²⁵Ceedoowo gooŋgaajo hisnan yoŋkiiji, ammaa kasotooɗo pewe waɗan rikici.

²⁶Kulɗo Jawmiraawo woodi hoolaare semmbiɗnde, ɓikkoy maako boo keɓan hisrude.

²⁷Kulol Jawmiraawo woni seeɓoore ngeendam haa daɗugo tuuforli maayde.

²⁸Ɗuuɗugo yimɓe ɗum daraja laamiiɗo, sooyugo yimɓe ɗum halkere maako.

²⁹Neeɓa-tikkereejo mari faamu, ammaa yaawa-tikkereejo waŋginan faataare mum.

³⁰Ɓernde de'unde woni ngeendam ɓanndu, ammaa kaajal nanndi bee gilɗi nyaamooji nder i'e.

³¹Ɓillanɗo laafuɗo ɗon huɗa tagɗo mo, enɗanɗo talakaajo ɗon teddina mo.

³²Halleende kalluɗo do'an mo, ammaa laaɓeeŋga adiliijo hisnan ɗum.

³³Hikma ɗon jooɗi nder ɓernde kakkilɗo, ammaa ka waŋgataa nder faataaɓe.

³⁴Adilaaku ɓaŋgtan ummaatoore, ammaa hakke toskan nde.

³⁵Laamiiɗo yerdoto suka mum kakkilɗo, ammaa o tikkanan cemtiniiɗo.