Read Fulfulde Balndi 17 Bible Online

Balndi 17 - Fulfulde bible

Balndi 17

¹Ndikka nyiiri ɗaajaari bee de'ere dow saare heewnde kusel bee jokkirgol.

²Maccuɗo kakkilɗo ɓuran ɓiɗɗo cemtiniiɗo, o heɓan ndonŋgu bee deerɗiraaɓe.

³Ɓolinirɗum waŋginan saman cardi malla kaŋŋeeri, ammaa poondoowo ɓerɗe ɗum Jawmiraawo.

⁴Baɗoowo kalluɗum ɗon hakkilana bolle kalluɗe, pewoowo ɗon heɗito pewe.

⁵Jancanɗo laafuɗo ɗon huɗa tagɗo mo, ceyortooɗo sarru hisataa kiita.

⁶Daraja ndotti'en, ɗum marugo taaniraaɓe, fawne ɓikkoy boo, ɗum baabiraaɓe maɓɓe.

⁷Bolle cuɓaaɗe pottantaa paataaɗo, sakko haala fewre haa mawɗo.

⁸Dokkuɗo ɗon laara dokkal mum bana layaaru, o tammi gal o yahata fuu o heɓan jaalorgal.

⁹Cuddanɗo aybe ɗaɓɓitan soobaaku, ammaa bolwibolwinanɗo senndan sooba'en.

¹⁰Felugo kakkilɗo nde woore nafan mo, ɓuri fiyugo paataaɗo nde teemerre.

¹¹Sey tuurtol tan kalluɗo ɗaɓɓata, ammaa Allah nelanan mo nelaaɗo kulniiɗo.

¹²Ndikka fottugo bee ɓoodu koocanaandu ɓikkoy mum dow fottugo bee paataaɗo nder faataare mum.

¹³Mo warjori booɗɗum bee kalluɗum, sarru daayataako saare maako.

¹⁴Fuɗɗugo jokkirgol, ɗum seekugo diŋiwol. To a anndi a waawataa haɓre, taa fuɗɗu.

¹⁵Adilinɗo aybuɗo e aybinɗo adiliijo, Jawmiraawo ɗon wanya ɓe ɗiɗo fuu.

¹⁶Ɗume ceede haa juŋngo paataaɗo nafata? Haa o sooda hikma na, nde o walaa hakkiilo?

¹⁷Soobaajo yiɗan koo ndey, ammaa deerɗiraawo danyaama ngam wakkati ɓillaare.

¹⁸Koo moy fiyi dammaana ngam keeddiɗɗum, o walaa hakkiilo.

¹⁹Giɗɗo jokkirgol yiɗi hakke, townanɗo dammugal mum ɗaɓɓan yibbere.

²⁰Sela-ɓerndeejo heɓataa hayru, halla-ɗemŋgaljo yanan nder sarru.

²¹Danyɗo humakiijo, mettamɓeram heɓan ɗum, baaba paataaɗo walaa seyo.

²²Ɓernde seyiinde hurgan ɓanndu, ammaa ruuhu tampuŋgu ittan semmbe i'e.

²³Kiitoowo kalluɗo jaɓan dokkal, ngam o lelna kiita ngooŋɗuka.

²⁴Kakkilɗo marɗo hikma waɗan ko woni yeeso mum, ammaa gite paataaɗo ɗon ngiilo haa keeri duniyaaru.

²⁵Ɓiɗɗo paataaɗo ɗum metteeŋga haa baaba mum, ɗum kaaɗeeŋga haa debbo danyɗo mo.

²⁶Yoɓnugo mo walaa aybe, wooɗaay, ɓoccugo mawɓe boo ɗum haanaay.

²⁷Naŋgtuɗo bolle mum mari anndal, marɗo gikku peewŋgu woodi faamu.

²⁸Koo paataaɗo boo, to jeeɗake, ɓe ndaaran mo o hikmaajo. To o maɓɓi hunnduko maako, ɓe ndaaran mo o kakkilɗo.