Read Fulfulde Balndi 19 Bible Online

Balndi 19 - Fulfulde bible

Balndi 19

¹Talakaajo tokkiiɗo gooŋgaaku ɓuri diskuɗo bolwanɗo faasikaare.

²To anndal woodaa, haɓdugo nafataa, jaawanɗo waɗan boofi.

³Faataare neɗɗo wonnan laawol muuɗum, ammaa o aybinan Jawmiraawo.

⁴Jawdi ɗuɗɗinan sooba'en, ammaa talakaajo, soobaajo maako seedan bee maako.

⁵Ceedoowo fewre hisataa kiita, bolwanɗo pewe daɗataa.

⁶Ɗuuɗɓe ɗon teddina mawɗo bee naafikaare, koo moy yiɗi soobrugo bee caahiiɗo.

⁷To goɗɗo o talakaajo, deerɗiraaɓe muuɗum nganyan ɗum, koo soobiraaɓe maako ndaayoto mo, koo o yiɗi wolwugo ma, walaa nananɗo mo.

⁸Keɓanɗo hakkiilo yiɗi hoore mum, kakkilananɗo faamu heɓan hayru.

⁹Walaa ceedoowo fewre hisata kiita, bolwanɗo pewe halkan.

¹⁰Paataaɗo fotaay riskugo, sakko maccuɗo fota umrugo laamiiɓe.

¹¹Hakkiilo neɗɗo laatinan mo neeɓa-tikkereejo, yejjititgo aybe goɗɗo laatanto mo daraja.

¹²Tikkere laamiiɗo nanndi bee ubbaaŋgo mbarooga, yerduye maako boo nanndi bee saawawre dow huɗo.

¹³Ɓiɗɗo paataaɗo woni sarru haa baaba mum, jokkirli debbo ngoni ci'ol ngol timmataa.

¹⁴Goɗɗo ronan saare e jawdi haa baaba, ammaa debbo kakkilɗo, ɗum dokkal Jawmiraawo.

¹⁵Mbaateendam ɗuɗɗinan ɗoyɗi, doole mbaateendamjo maata dolo.

¹⁶Ɗowtantooɗo umrooje Allah aynan yoŋki mum, jawotooɗo ɗe maayan.

¹⁷Enɗanɗo laafuɗo hokki Jawmiraawo nyamaande, kaŋko o warjoto mo mbooɗeeŋga nga'a.

¹⁸Eltu ɓiya saa'i tammunde ɗon, ammaa taa fiy ngel bee tikkere haa yotto maayde.

¹⁹Yaawa-tikkereejo, doole o yoɓa aybe maako, ngam to a acci mo, o tullitan.[6]

²⁰Nan wasuye, jaɓ anndinki, ngam bana nii keɓrata hikma.

²¹Anniyaaji ɓernde neɗɗo ɗuuɗi, ammaa muuyo Jawmiraawo tan laatoto.

²²Ko ɓe ngiɗi haa neɗɗo, ɗum mbooɗeeŋga maako. Talakaajo ɓuri pewoowo.

²³Kulol Jawmiraawo yahran haa ngeendam, goɗɗo waalan o kaarɗo, sarru warantaa mo.

²⁴Mbaateendamjo nastinan juŋngo mum nder le'al, o waawataa wartirgo ngo haa hunnduko.

²⁵To a ɓocci jancoowo, sooya-anndaljo heɓan hakkiilo. To a feli kakkilɗo, o ɓesdan anndal.

²⁶Mo toonyi baaba mum malla riiwi daada mum, kaŋko woni ɓiɗɗo cemtiniiɗo, toskiiɗo.

²⁷Ɓiŋngel am, to a acci heɗitaago anndinki, a yejjitan law ko a anndi.

²⁸Ceedoowo ɓalwa-ɓerndeejo ɗon yawna gooŋga, zunuuba welani hunnduko kalluɗo.

²⁹Yaŋgada taaskanaama jancooɓe, ɓocci boo ngam ɓaawe faataaɓe.