Read Fulfulde Balndi 2 Bible Online

Balndi 2 - Fulfulde bible

Balndi 2

¹Ɓiŋngel am, to a jaɓi bolle am, to a sigake umrooje am haa maaɗa,

²to a hakkilani ko hikma ekkitinta, a huucitini ɓernde ma heedi faamu,

³to a torake hakkiilo, a ewnake bee sawtu haa a heɓa faamu,

⁴to a ɗaɓɓiti ngu bana cardi, a tefi ngu bana ndesaaje nyukkiiɗe,

⁵nden kam a faaman ko woni kulol Jawmiraawo, a heɓan anndal Allah.

⁶Ngam Jawmiraawo hokkata hikma, anndal e faamu iwan haa hunnduko maako.

⁷Kaŋko o ɗon walla gooŋga'en, o ɗon ayna huuwanɓe bee laaɓeeŋga ɓernde.

⁸O ɗon ayna waɗanɓe ko fotti, o ɗon ayna hoolaaɓe maako.

⁹To a nanani yam, a faaman ko fotti, ko gooŋɗi, ko wooɗi, a anndan huuwugo kuuɗe booɗɗe fuu.

¹⁰Kanjum hikma nastan ɓernde ma, anndal boo seynan yoŋki ma.

¹¹Kirseeku reenete, faamu boo aynete,

¹²ngam daaytingo ma e laawol halluɓe, e wolwanɓe pewe.

¹³Ɓe acci laabi darnuɗi, ngam tokkaago nyiɓre.

¹⁴Ɓe ɗon ceyoro waɗugo kalluɗum, dabareeji kalluɗi laati welwelo maɓɓe.

¹⁵Ɓe celi gooŋga, ɓe ɗon tokko laabi leliiɗi.

¹⁶A hisan boo debbo jeenoowo, estanɗo ma bee bolle belɗe,

¹⁷mo acci gorko muuɗum, mo yejjiti alkawal teegal ngal o haɓɓino yeeso Allah.

¹⁸Laawol haa suudu maako ɗum laawol maayde, nastugo ndu ɗum ɓaditaago joonde maayɓe.

¹⁹Nastuɓe haa maako ngartataa, ɓe lorataako haa laawol ngeendam.

²⁰Ngam maajum tokka laawol wooɗɓe, taa sel laawol adili'en.

²¹Ngam gooŋga'en njooɗoto nder lesdi, ɓe ngalaa feloore luttan nder maari.

²²O ittan zammbotooɓe nder maari, ɓe ngudinteeɓe daayiiɗum bana leɗɗe.