Read Fulfulde Balndi 20 Bible Online

Balndi 20 - Fulfulde bible

Balndi 20

¹Inaboojam laatinte jancoowo, nguykinoojam boo kooloowo, guykoowo laatataako hikmaajo sam.

²Ɓernuki laamiiɗo nanndi bee ubbaaŋgo mbarooga, tikkinanɗo mo halkan yoŋki mum.

³Reentingo hoore mum e jokkirgol, ɗum daraja ngam neɗɗo, ammaa paataaɗo nastan ngol.

⁴To duumol waɗi, mbaateendamjo yiɗaa remugo. Saa'i codol o ɗaɓɓan, ammaa o heɓataa koo ɗume.

⁵Numooji ɓernde neɗɗo ngoni ndiyam lugguɗam, ammaa kakkilɗo nyeɗan ɗam.

⁶Yimɓe ɗuuɗɓe ɗon ngeyna mbooɗeeŋga muuɗum'en. Ammaa moy tawata neɗɗo koolaaɗo?

⁷Adiliijo ɗon tokko laawol mum bee laaɓeeŋga. Barka laatanto ɓiɓɓe maako koo ɓaawo maako.

⁸Laamiiɗo, to jooɗake dow leeso kiita, heɓtan kalluɗum fuu bee gite mum.

⁹Moy waawata wi'ugo: “Mi laɓɓini ɓernde am, mi laaɓɗo diga hakke am?”

¹⁰Awnorɗum ɗiɗorjum e etirɗum ɗiɗorjum, Jawmiraawo ɗon wanya ɗum fuu.

¹¹Nder kuuɗe mum, derkeejo ɗon waŋgina to yahdu mum laatoto laaɓndu malla gooŋɗundu.

¹²Nofru nanooru e yiitere yi'oore, Jawmiraawo waɗi ɗum ɗiɗi fuu.

¹³To a ɗuɗɗini ɗoyɗi, a talkiɗan. To a maɓɓiti gite ma, a haaran nyaamdu.

¹⁴Coodoowo ɗon wi'a: “Wooɗaay, wooɗaay!” Nden to o soodi, o dilla o ceyiiɗo.

¹⁵Woodi kaŋŋeeri, woodi boo luuluuje ɗuuɗɗe, ammaa fawne ɓurɗe wooɗugo, ɗum hunnduko marko anndal.

¹⁶Hoo'u limce piyɗo dammaana ngam goɗɗo, sey o wallina jeŋngina to ɗum jananno.

¹⁷Nyaamdu heɓaandu bee rikici welanan goɗɗo, ammaa ɓaawoɗon hunnduko maako heewan korka'e.

¹⁸Nufayeeje kiɓɓoto bee carwootiral. To a yiɗi waɗugo haɓre, aartu numugo.

¹⁹Baɗoowo tufle waŋginan sirri, taa hawtan ɗuuɗa-haalaajo.

²⁰Kuɗɗo baaba mum malla daada mum, ngeendam mum nyifan bana pittirla nder nyiɓre ɓaleere.

²¹Risku keɓaaŋgu bee jaawal haa fuɗɗam, waɗataa barka haa ragare.

²²Taa wi': “Mi waatoto kalluɗum.” Hoola Jawmiraawo, kaŋko o wallete.

²³Jawmiraawo ɗon wanya etirɗum ɗiɗorjum, awnorɗum rikiciijum fottaay.

²⁴Jawmiraawo ɗowata palanɗe neɗɗo. Kadi noy neɗɗo faamrata laawol mum?

²⁵Mo yaawi wi'ugo: “Ɗum cenaaɗum”, nasti tuuforgol, ngam o fuɗɗan numugo ɓaawo togayeere.

²⁶Laamiiɗo kakkilɗo heɓtan waɗɓe kalluɗum, nden o hiitoto ɓe bilaa enɗam.

²⁷Ruuhu neɗɗo woni pittirla Jawmiraawo, ka wiɗititto ko woni nder neɗɗo fuu.

²⁸Mbooɗeeŋga e gooŋgaaku aynan laamiiɗo, leeso laamu maako tabitan bee mbooɗeeŋga.

²⁹Daraja sukaaɓe, ɗum semmbe maɓɓe, fawne ndotti'en, ɗum dandanndi maɓɓe.

³⁰Ɓocci haa ƴiiƴam kurgan halleende, fiyugo wo'itinan ɓernde.