Read Fulfulde Balndi 21 Bible Online

Balndi 21 - Fulfulde bible

Balndi 21

¹Bana maayel, non ɓernde laamiiɗo wa'i haa juŋngo Jawmiraawo, o ɗowan nde koo toy o yiɗi fuu.

²Koo moy ɗon laara kuuɗe mum ɗe pottuɗe, ammaa Jawmiraawo ɗon linya ɓerɗe.

³Waɗugo adilaaku e pottuɗum ɓuri fottango Jawmiraawo dow kirseteeɗi.

⁴Gite mawnitiiɗe e ɓernde ƴaggiinde e hayru halluɓe, kanjum woni hakke.[7]

⁵Numooji tiiniiɗo ngaddanan ɗum hayru, ammaa jaawanɗo, sooynde tan laatanto ɗum.

⁶Heɓrugo ndesaaje bee ɗemŋgal pewoowal, ɗum taasnugo henndu e nastugo tuuforli maayde.

⁷Toonyaaŋge halluɓe halkan ɓe, ngam ɓe cali waɗugo ko fotti.

⁸Laawol aybuɗo leliiŋgol masin, ammaa kuugal laaɓɗo darnuŋgal cir.

⁹Jooɗaago dow seɓatto soorowol ɓuri jooɗaago nder suudu bee debbo giɗɗo jokkirli.

¹⁰Ɓernde kalluɗo ɗon ɗaɓɓa kalluɗum, keeddiɗɗiiko heɓataa enɗam haa maako.

¹¹To jancoowo hiitaama, sooya-anndaljo heɓan hakkiilo. To hikmaajo anndinaama, o heɓan anndal.

¹²Adiliijo ɗon hakkilana saare kalluɗo, haa o do'a halluɓe nder sarru.

¹³Cukkanɗo noppi mum ngam gookaali laafuɗo, kaŋko boo o wookan, ammaa walaa nananɗo ɗum.

¹⁴Caahu bee sirri feewtinan ɓernde, dokkal nder jiiba feewtinan tikkere saatunde.

¹⁵Waɗugo ko fotti seynan adiliijo, ammaa ɗum hulnan waɗooɓe zunuuba.

¹⁶Accuɗo tokkaago laawol hakkiilo waaloto caka maayɓe.

¹⁷Giɗɗo welwelooji laatoto talakaajo, giɗɗo inaboojam e nyaamdu welndu heɓataa jawdi.

¹⁸Kalluɗo, faasikiijo nastan sarru ngu o nufi nastingo adiliijo, laaɓɗo.

¹⁹Jooɗaago haa ladde meere ɓuri marugo debbo jokkiroowo e mettinoowo ɓernde.

²⁰Jawdi e risku ɗon haa saare hikmaajo, ammaa paataaɗo majjinan ɗum law.

²¹Ɗaɓɓitanɗo adilaaku e mbooɗeeŋga heɓan ngeendam, yerduye e tedduŋgal.

²²Hikmaajo jaaloto berniwol semmbiɗɓe, o yibbinan hisrude nde ɓe kooli ɗum.

²³Aynanɗo hunnduko mum e ɗemŋgal mum, aynan yoŋki mum e ɓillaare.

²⁴Mawnitiiɗo, elewɗo, kaŋko wi'ete jancoowo, o ɗon waɗa koo ɗume fuu bee mawnitaare fantunde.

²⁵Suuno mbaateendamjo mbaran mo, ngam juuɗe maako cali huuwugo.

²⁶O ɗon nyalla ɗaɓɓugo kuuje, ammaa adiliijo hokkan, walaa naŋgtugo.

²⁷Kirseteeŋga kalluɗo woni nyidduɗum, sakkomaa nde o lii'oto nga bee anniya kalluka.

²⁸Seedamku pewoowo jaɓataake, ammaa wolde kakkilɗo jaɓeteende.

²⁹Kalluɗo yoornan gite mum, ammaa gooŋɗuɗo darnan laabi mum.

³⁰Koo hikma, koo hakkiilo, koo anndal, walaa ko dartanto Jawmiraawo.

³¹Goɗɗo taaskoto bee puccu mum ngam nyalaade haɓre, ammaa jaalorgal iwan haa Jawmiraawo.