Read Fulfulde Balndi 27 Bible Online

Balndi 27 - Fulfulde bible

Balndi 27

¹Taa jura ngam jaŋngo, a anndaa ko hannde waddata.

²Taa maŋgtu hoore ma, sey goɗɗo feere maŋgte, jananno, ammaa naa an bee hoore ma.

³Hayre teddi, njaareendi boo ɗum doŋngal, ammaa metteeŋga paataaɗo ɓuri ɗum ɗiɗi fuu teddugo.

⁴Ɓernuki saati, tikkere nanndi bee maayo faccanŋgo, ammaa moy munyanta kaajal?

⁵Feloore waŋgunde ɓuri soobaaku cuuɗiiŋgu.

⁶Soobaajo naawnanɗo bee pelooje mum he'i hoolaare, ammaa konneejo ɗuɗɗinan koofli naafikiiji.

⁷Kaarɗo yaaɓan njumri bee kosɗe, ammaa haa beelaaɗo koo kaaɗɗum welan.

⁸Bana sonndu yiilotoondu daayiiɗum bee saɓɓo mum, non goɗɗo giilotooɗo daayiiɗum bee saare mum wa'i.

⁹Nebbam wujaago e uurle ceynan ɓernde, heɓugo soobaajo booɗɗo ɓuri sarwanaago hoore mum.

¹⁰Taa accu soobaajo ma, koo soobaajo baaba ma, nyannde ɓillaare taa nastu saare deerɗa haa tefa ballal, keeddiɗɗiraawo ɓadiiɗo ɓuri deerɗiraawo daayiiɗo.

¹¹Ɓiŋngel am, laata hikmaajo, seynu ɓernde am, haa mi heɓa ko mi jaabo toskuɗo yam.

¹²Kakkilɗo to yi'i sarru, nyukkoto, ammaa sooya-anndal'en tokkoto laawol, ɓe naawno.

¹³Hoo'u limce piyɗo dammaana ngam goɗɗo, sey o wallina jeŋngina to ɗum jananno.

¹⁴To a findini keeddiɗɗa fajiri cub bee koofŋgol barka, o faaman ɗum bana naaloore.

¹⁵Si'ugo suudu nyannde iyeende e debbo baɗoowo jokkirgol ɗon nanndi:

¹⁶Je'ingo mo heɓataako bana naŋngugo henndu malla jogaago nebbam.

¹⁷Njamndi welnata njamndi, gondal bee keeddiɗɗiraawo semmbiɗinan.

¹⁸Kakkilananɗo ibbi nyaaman ɓiɓɓe maaki, kakkilananɗo jawmum heɓan tedduŋgal.

¹⁹Bana yeeso nanndiri bee yeeso nder ndiyam, non ɓernde neɗɗo nanndiri bee neɗɗo.

²⁰Joonde maayɓe e nokkuure halkere kaarataa, bana non gite neɗɗo boo caftataa laarugo.

²¹Ɓolinirɗum waŋginan saman cardi malla kaŋŋeeri, no neɗɗo wa'i waŋgan bee ko ɓe mbi'anta mo.

²²Koo to a uni paataaɗo bee gaafgal nder unordu caka gawri, bee non fuu faataare maako accataa mo.

²³Anndu dammooji ma fuu, hakkilan tokke ma booɗɗum,

²⁴ngam jawdi duumataako, maral tabitittaa diga yidere haa yidere.

²⁵To a wa'i huɗo, huɗo hecco boo wiliti fahin, to a mooɓti geene haa kooseeje,

²⁶nden mar baali ngam holtingo ma e jawɗi ngam soodugo ngesa

²⁷e kosam be'i ɗuuɗɗam ngam wuurnugo ma, an bee saare ma e horɓe ma fuu.