Read Fulfulde Balndi 28 Bible Online

Balndi 28 - Fulfulde bible

Balndi 28

¹Kalluɗo doggan, koo to taasnanɗo mo woodaa, ammaa adiliijo ɗon hoolɗini bana mbarooga.

²To ummaatoore tuurti, laamananɓe nde ɗuuɗan. Ammaa jam ɗon tabita to goɗɗo marɗo anndal e kirseeku ɗon laamo.

³Marɗo baawɗe, ɓillanɗo laafuɓe nanndi bee iyeende saatunde nde luttintaa nyaamdu.

⁴Accuɓe tawreeta maŋgtan halluɓe, ammaa ɗowtantooɓe tawreeta konan ɓe.

⁵Halluɓe paamataa ko fotti, ammaa ɗakkotiranɓe bee Jawmiraawo paaman koo ɗume fuu.

⁶Talakaajo tokkiiɗo gooŋgaaku ɓuri diskuɗo tokkotooɗo laabi leliiɗi.

⁷Ɗowtantooɗo tawreeta, kaŋko woni ɓiɗɗo kakkilɗo, ammaa kawtanɗo bee daakaare'en semtinan baaba mum.

⁸Ɗuɗɗinanɗo jawdi mum bee riba e ndiyam, ko o mooɓti fuu laatanto enɗoowo laafuɓe.

⁹To goɗɗo sukki noppi mum ngam taa o nana tawreeta, tornde maako laatoto nyiddunde haa Allah.

¹⁰Majjinanɗo gooŋga'en dow laawol kalluŋgol, kaŋko bee hoore maako o yanan nder ngaska maajum, ammaa timmuɓe keɓan hayru.

¹¹Diskuɗo ɗon laara hoore mum hikmaajo, ammaa laafuɗo kakkilɗo annditan naa non.

¹²To adili'en njaalake, juulde waɗan, ammaa to halluɓe ɓaŋgake, yimɓe nyukkoto.

¹³Cuuɗanɗo aybeeji mum heɓataa jaalorgal, ammaa mo waŋgini ɗi, acci ɗi, heɓan hinnuye.

¹⁴Barka laatanto kulɗo Jawmiraawo foroy, ammaa saata-hooreejo yanan nder sarru.

¹⁵Bana mbarooga ubbanŋga e ɓoodu weelaandu, non kalluɗo laamaniiɗo ummaatoore laafuɓe wa'i.

¹⁶Laamiiɗo mo walaa faamu, ɗuɗɗinan ɓillaaje, ammaa laamiiɗo ganyanɗo ngeenaari zammba juttinan balɗe mum.

¹⁷Mo aybe mbar-hoore ɗon dow muuɗum, doggan haa yotto yenaande mum. Taa goɗɗo jogito mo.

¹⁸Jahanɗo bee gooŋgaaku hisan, ammaa tokkiiɗo laabi ɗiɗi yanan nder gootol maaji.

¹⁹Demanɗo gese mum haaran nyaamdu, ammaa cuklaniiɗo kuuje meereeje saftan talakaaku.

²⁰Goɗɗo gooŋgaajo woodi barka ɗuuɗka, ammaa jaawananɗo riskugo hisataa kiita.

²¹Senndindirgo yimɓe yeeso kiita, wooɗaay. Ammaa hiitooɓe feere mbaɗan aybe koo ngam heɓugo loŋngere nyiiri woore.

²²Suuna-giteejo ɗon yaawana riskugo, o anndaa sooynde waranan mo.

²³Pelanɗo goɗɗo heɓan yerduye maako ko ɓuri belnananɗo mo ɗemŋgal mum.

²⁴Koo moy wujji baaba mum malla daada mum, wi'i: “Naa ɗum aybe”, hawtan bee fasooɓe laawol.

²⁵Ɗuuɗa-suunoojo umminan jokkirgol, ammaa koolotooɗo Jawmiraawo heɓan hayru.

²⁶Koolotooɗo numooji hoore mum woni paataaɗo, ammaa jahanɗo bee hikma hisan.

²⁷Dokkanɗo talakaajo anndataa sooynde, ammaa mumnanɗo gite mum ngam taa yi'a talaka'en, ɗuuɗɓe naalan mo.

²⁸To halluɓe ɓaŋgake, yimɓe nyukkoto. To halluɓe kalki, adili'en ɓesdoto ɗuuɗugo.