Read Fulfulde Balndi 30 Bible Online

Balndi 30 - Fulfulde bible

Balndi 30

¹Ndaa bolle Aguuru ɓii Yake, ɗe o seedani Itiyel e Ukal: “Mi haɓdi, yaa Allah, mi haɓdi, yaa Allah, jonta mi somi[13].

²Mi tullidi yimɓe fuu humakaaku, mi walaa hakkiilo neɗɗo.

³Mi anndinaaka hikma sam, mi anndaa koo ɗume haa Allah Ceniiɗo.

⁴Moy eeŋgi haa asama, jippi diga ton? Moy mooɓti henndu haa juuɗe mum? Moy haɓɓi ndiyamji nder limce mum? Moy tabitini keeri duniyaaru? Noy innde maako e innde ɓiyiiko? An a anndi na?”

⁵“Wolde Allah koo ndeye nde laaɓnde, Allah ɗon ayna hoolotooɓe mo fuu bana wawarde[14].

⁶Taa ɓesdu koo ɗume haa bolle maako, ngam taa o fele, taa o waŋgine a pewoowo.”

⁷“Yaa Allah, mi ɗon toro ma kuuje ɗiɗi, taa salanam ɗe hiddeko mi maaya:

⁸Daaynanam faasikaare e fewre, taa hokkam talakaaku koo risku. Hokkam geɗal nyaamdu deydey haaje am,

⁹ngam taa mi haara, nden mi zammbo ma, mi wi'a: Moy woni Jawmiraawo? Taa mi talkiɗa boo, nden mi wujja, mi waɗa aybe dow innde maaɗa, yaa Allah am.”

¹⁰“Taa waadu kuuwoowo bee jaagorɗo mum, ngam taa o naale, an boo a yara bone.”

¹¹“Woodi yimɓe naalanɓe baabiraaɓe muuɗum'en, ɓe mbarkiɗintaa daadiraaɓe maɓɓe.

¹²Woodi yimɓe, ɓe laaɓɓe haa gite maɓɓe, ammaa ɓe lootaay tuundi maɓɓe.

¹³Woodi yimɓe, ɓe mawnitiiɓe masin, gite maɓɓe ɗon mawnito tum.

¹⁴Woodi yimɓe, nyii'e maɓɓe bana kaafaaje, liwe maɓɓe bana labbe, haa ɓe nyaama laafuɓe haa lesdi e talaka'en caka yimɓe.”

¹⁵Mbalku woodi ɓiɓɓe rewɓe ɗiɗo, inɗe maɓɓe: Hokkam e Hokkam. Kuuje tati kaarataa, huunde nayaɓre boo wi'ataa: “He'i!”

¹⁶Ɗum joonde maayɓe e danyrugol dimarol e lesdi ndi saftataa iyeende e yiite nge wi'ataa: “He'i kadi!”

¹⁷Jancanɗo baaba mum e caliiɗo ɗowtanaago daada mum, leekuuje cumpitan gite maako haa maayo, ɓikkoy dutal moɗan ɗe.

¹⁸Kuuje tati laatani yam kaayeefiije, huunde nayaɓre boo mi faamataa nde:

¹⁹Ɗum laawol dutal piiranŋgal haa asama e laawol mboodi dow tapaaje e laawol koommbowal[15] ta'anŋgal mbeela e laawol gorko gal debbo mum.

²⁰Debbo jeenoowo waaldan bee gorko, nden o yiiwo, o wi'a: “Mi waɗaay aybe”, bana to o nyaami, o yiggi hunnduko maako.

²¹Kuuje tati ndimmban lesdi, huunde nayaɓre boo, ndi waawataa ɓusaago nde:

²²Ɗum maccuɗo to laatake laamiiɗo e halla-ɓerndeejo to heɓi risku

²³e debbo kalluɗo to goɗɗo te'i mo e korɗo to marti pellel jawmum debbo.

²⁴Woodi kuuje nayi ɓurɗe famɗugo haa lesdi, ammaa ɗe mari hikma masin:

²⁵Konndorle laataaki ummaatoore marnde semmbe, ammaa ɗe mooɓtan nyaamdu maaje diga ceeɗu.

²⁶Jama-gudde laataaki ummaatoore semmbiɗnde, ammaa ɗe mbaɗan cuuɗi maaje nder tapaaje.

²⁷Baɓɓatti ngalaa laamiiɗo, ammaa ɗi piiran bee tokkotiral bana mooɓe konu.

²⁸Pallaaɗe, a waawan naŋngugo ɗe bee juŋngo, ammaa ɗe nastan koo nder cuuɗi laamiiɓe aynaaɗi.

²⁹Kuuje tati ngoodi yahdu wooɗndu, huunde nayaɓre boo woodi palanɗe booɗɗe:

³⁰Mbarooga marŋga baawɗe caka dabbaaji, walaa ko lortinta nga

³¹e asgumri[16] naɗɗino-ɓaawoori e njawdiri mbeewa e laamiiɗo yeeso mooɓre konu mum[17].

³²To a yiɗi maŋgtugo hoore ma, koo bee daliila, koo bilaa daliila, ndikka to a waɗi juŋngo dow hunnduko ma!

³³Dimmbugo kosam waɗan leeɓol, ɓiɗɗugo kine waɗan ƴiiƴam, tikkingo yimɓe umminan jokkirgol.