Read Fulfulde Balndi 31 Bible Online

Balndi 31 - Fulfulde bible

Balndi 31

¹[18] Ndaa bolle wahayu ɗe daada laamiiɗo Lemu'iila anndini mo:

²“An woni ɓiɗɗo am giɗaaɗo mo keɓrumi bee togayeeje ɗuuɗɗe.

³Taa halku semmbe ma e jawdi ma bee rewɓe, taa wonnuɓe laamiiɓe kalke.

⁴Lemu'iila am, inaboojam e nguykinoojam haandanaay laamiiɓe.

⁵Ngam to ɓe nguyki, ɓe ngejjitan ko haandani ɓe, ɓe kiitantaako laafuɓe kiita gooŋga.

⁶Nguykinoojam wooɗi ngam torriiɗo, ɗam nafan laska-ɓerndeejo.

⁷O yara ɗam, o yejjita bone maako, taa o siftora torra maako.

⁸An, wolwu haa pellel muuka'en e ɓe ngalaa wallooɓe fuu.

⁹Waɗan ɓe kiita ngooŋɗuka, hiitora ɓilliiɓe e talaka'en fuu bee gooŋga.”

¹⁰Debbo tiiniiɗo, moy heɓata ɗum? Saman maako ɓuri luuluuje piw.

¹¹Ɓernde goriiko ɗon hooli mo, o sooyataa keɓal sam.

¹²Debbo oo waɗanan mo booɗɗum, naa kalluɗum, balɗe ngeendam maako fuu.

¹³O ɗaɓɓan gaasa baali e hottollo, o huuwan ɗum bee juuɗe tiiniiɗe.

¹⁴O nanndi bee koommbooje[19] filooɓe, diga daayiiɗum o waddoyan nyaamduuji maako.

¹⁵Diga weetaay, o ummoto, o waɗa nyaamdu saare maɓɓe, o senndana horɓe maako kuugal.

¹⁶O numan haala ngesa, o soodan ka, bee nafuuda juuɗe maako, o juboto ngesa inabooje.

¹⁷O baawɗo kuugal, o woodi semmbe, o ɗon huuwa bee tiinaare.

¹⁸O anndi nafuuda kuuɗe maako, o huuwan koo jemma, o accataa pittirla maako nyifa.

¹⁹Juŋngo maako jogoto kardumbal, kooli maako naŋngan dorwere.

²⁰O lii'anto laafuɓe juŋngo maako, o hokkan talaka'en bee caahaaki.

²¹Jaaŋgol hulnataa mo, ngam koo moy nder saare maɓɓe mari limce ɗiɗi.

²²O waɗanan hoore maako godooje, o ɗon haddo limce boɗeeje ɗelemɗe.

²³To goriiko ɗon jooɗi caka ndotti'en haa dawriinde berniwol, yimɓe ɗon teddina mo.

²⁴O sannyan gude e taadorli, o soorran ɗum filooɓe.

²⁵O maran baawɗe e daraja, haajeeji jaŋngo ɓillataa mo.

²⁶O wolwan bee hikma, wasuyeeji booɗɗi ɗon haa ɗemŋgal maako.

²⁷O aynan ko laatoto nder saare maɓɓe fuu, o nyaamataa nyaamdu mbaateendam.

²⁸Ɓiɓɓe maako ummoto, mbarkiɗinan mo, goriiko boo maŋgtan mo:

²⁹“Woodi rewɓe ɗuuɗɓe tiiniiɓe, ammaa an a ɓuri ɓe fuu!”

³⁰Ngarol ɗum rikici, booɗki boo ɗum esto, debbo kulɗo Jawmiraawo, kaŋko he'i maŋgteego.

³¹Ndokke mo mbarjaari tiinaare maako, yimɓe berniwol fuu maŋgta mo ngam kuuɗe maako.